हराएको विश्वासलाई नयाँ जीवन दिने समय

आज सबैको मुखमा एउटा ‘कमन वर्ड’ झुण्डिएको छ, युवा पुस्ता चरम निराश भएर विदेश पलायन भइरहेको छ र देश खाली हुँदैछ । युवाको विदेश पलायन निराशा वा अवसर नपाएरमात्र हो कि ‘बेटर लाइफ’ र देखासिखीको लागि पनि हो भन्ने कोणबाट कोही बहस गर्न तयार छैन ।

के यो देश साँच्चिकै बस्न लायक नभएकै हो त ? हाम्रो नेतृत्वले विश्वास गुमाएकै हो त त ? के विश्वव्यापीकरणको प्रभावभन्दा बाहिर हामी र हाम्रो समाज बस्न सक्छ त ? यस्ता प्रश्नको जवाफ नखोजी हामीले हराएको विश्वास फेरि जगाउन सक्दैनौं ।

नेपाल अहिले परिवर्तनको चरणमा छ, जहाँ हरेक तहमा चुनौती र अवसर हातेमालो गर्दै अघि बढिरहेका छन्। देशका ७७ जिल्लामा कतै एकैखाले र कतै फरक खाले विभिन्न समस्या छन् । रोजगारीको अभाव, गरिबी, शिक्षा र स्वास्थ्यमा सहज पहुँच, र युवाहरूको विदेश पलायन । तर, यी चुनौतीहरूको सामना गर्न हामीसँग आशाको ज्योति छ ।

आशा भनेको एउटा प्रकाश हो, जसले अन्धकारमा पनि बाटो देखाउँछ । देशमा अवसर कम भए पनि, सम्भावना धेरै छन् । हामीसँग भरपूर प्राकृतिक स्रोत साधन छ । पर्यटन, कृषिमा नयाँ सोच र प्रविधि अपनाएर हजारौं रोजगारी सिर्जना गर्न सकिन्छ। साथै, नेपाली युवाको मेहनत र सिर्जनशीलता विश्वमै चिनिएको छ। यसलाई हामीले स्वदेशमै उपयोग गर्नुपर्छ।

बरु यस्ता विषयमा बहस र विमर्श किन नगर्ने ?

युवाहरूलाई समेट्दै, नेतृत्वको अभाव पूर्ति गरौं

देशको विकासमा मुख्य भूमिका युवाहरूको हो । उनीहरूलाई प्रोत्साहन गर्न, सीपमूलक तालिम, स्टार्टअप सहयोग, र नवीनताका लागि खुलामञ्च उपलब्ध गराउनु पर्छ । कोही किन निराश छ ? उसलाई यहिँभित्र अवसर छ भनेर देखाउने र सहजीकरण गर्ने नेतृत्वको आज जरुरी छ ।

सपना जिउँदो राखौं

विदेशमा अवसर खोज्ने कुरा गलत होइन, तर आफ्नै देशमा परिवर्तन ल्याउने सपना जिउँदो राख्नु आवश्यक छ । जसले गर्दा अर्को पुस्ताले हाम्रो योगदानलाई प्रेरणाको रूपमा हेर्न सकोस् ।

आउनुस्, आशाको दियो बालेर देशमा नयाँ सम्भावना खोजौं । साना कदमबाट पनि ठूला परिवर्तन सम्भव छ । निराशा भुलौं र दृढ विश्वासका साथ आफ्नै देशका लागि काम गरौं ।

नयाँ आशाको स्वरूप वर्तमान प्रधानमन्त्री केपी शर्मा ओलीले देशलाई नयाँ उचाइमा पुर्‍याउने वाचा गरेका छन् । उनको नेतृत्वमा पूर्वाधार विकास, शिक्षा सुधार, र ऊर्जा क्षेत्रमा भएका सकारात्मक प्रयासले जनतालाई आशाको किरण दिएको छ। उनले गरेका राम्रा कामहरूले देखाउँछ कि देशलाई परिवर्तन गर्ने सम्भावना जीवित छ।

आजको समाज कृतघ्न हुन सक्छ । राम्रा काम भएको पटक्कै नदेख्ने र स्वीकार नगर्ने तर नकारात्मक कुरा गर्न तथा विरोधमात्र गर्ने एउटा जमात तयार भएको छ । तर, प्रधानमन्त्री ओलीकै नेतृत्वमा आज देशका ठूला पूर्वाधार विकासले सफलता पाइरहेका छन् ।

प्रधानमन्त्रीका पहलहरूः आशा जगाउने प्रयासहरू

१. पूर्वाधार विकास

पछिल्लो समय सडक निर्माण, पुल निर्माण, र यातायात पूर्वाधारमा भएको प्रगति उदाहरणीय छ । जनतालाई सहज यातायात र विकासको पहुँच पुर्‍याउन यो क्षेत्रमा गरिएको कामले जनविश्वास बढाएको छ । नौबिसे नागढुंगा सुरुङमार्ग होस् या सिद्धबाबा भन्नुस् यी सपना अब विपनामा परिणत हुँदैछन् । टोखा छहरे सुरुङमार्ग बीआरआई परियोजना हालै प्रधानमन्त्रीको चीन भ्रमणमा परेको छ । सुनकोशी मरिन डाइभर्सन प्रधानमन्त्री ओलीकै ड्रिम प्रोजेक्ट अब सफलताको अन्तिम चरणमा छ ।

२. ऊर्जा क्षेत्रमा क्रान्ति

जलविद्युत् उत्पादनमा भएको तीव्र प्रगतिको कारण देशमा लोडसेडिङ घटेको छ । यसले मात्र नभई, निर्यातका लागि पनि ऊर्जा क्षेत्रमा सम्भावना खोलिएको छ । प्रधानमन्त्री ओलीको पहिलो कार्यकालमा लोडसेडिङ अन्त्यको मार्गचित्र बन्यो, काम गर्दा गर्दै सरकार ढलेपछि अर्को सरकारको पालामा कार्यान्वयन भयो । अहिले आएको ऊर्जा विकास मार्गचित्रले नेपाललाई जलविद्युतको हब बनाउनेछ ।

३. शिक्षा र स्वास्थ्य सुधार

देशका दुर्गम गाउँसम्म स्वास्थ्य सेवा पुर्‍याउन र विद्यालय सुधारमा गरिएको कामले ठूला परिवर्तन ल्याएको छ । प्रधानमन्त्रीको नेतृत्वमा ग्रामीण क्षेत्रमा स्वास्थ्य पहुँच सहज बनाउने उद्देश्यले नयाँ योजना लागू भएका छन् । देशका सबै स्थानीय तहमा एक-एक अस्पताल बन्ने क्रम चलिरहेका छन् ।

४. आर्थिक सुधार र रोजगारी सिर्जना

विदेशी लगानी भित्र्याउन र देशभित्रै रोजगारी सिर्जना गर्न गरिएको पहल सराहनीय छ । प्रधानमन्त्रीले कृषि, पर्यटन, र सूचना प्रविधिमा लगानी बढाउन विशेष प्राथमिकता दिएका छन् । अध्यादेशमार्फत विशेषगरी युवाहरूको ठूलो सहभागिता, आकर्षण र सम्भावना रहेको आईटी क्षेत्रमा लगानी प्रवर्द्धन, रोजगारी तथा सहजीकरणको लागि उल्लेख्य विषय समेटिएका छन् ।

जनताको आशा र जिम्मेवारी

प्रधानमन्त्रीका प्रयासले आशा दिएको भए पनि यो यात्रा सफल बनाउन सबै तहका जनप्रतिनिधि, निजी क्षेत्र, र नागरिक समाजले एकसाथ काम गर्नुपर्छ । योजनाको प्रभावकारी कार्यान्वयन र पारदर्शीता कायम गर्न सरकारप्रति जनताको भरोसा बलियो बनाउनु आवश्यक छ । पछिल्ला अध्यादेशमार्फत सरकारले निजी क्षेत्रको मन जित्न सफल भएको छ र यसले अन्ततः अर्थतन्त्र चलयामान भई रोजगारी थपिनेछ । यसका साथै भूमिहीन सुकुमबासी र अव्यवस्थित बसोबासीको समस्या सधैँका लागि समाधान गर्ने अध्यादेशसमेत हालै प्रधानमन्त्रीले ल्याइसकेका छन् ।

युवाहरूको भूमिका

देशलाई आत्मनिर्भर बनाउने र भविष्यलाई उज्यालो बनाउने मुख्य जिम्मेवारी युवाहरूको हो । उनीहरूले आफ्ना सीप र ऊर्जालाई देशभित्रै प्रयोग गर्नुपर्छ । सरकारी योजनाहरूमा सक्रिय सहभागी भई विकासको गति तेज बनाउन सकिन्छ । युवालाई विदेशभित्रै राखौं भन्ने कोरा भाषणले मात्र केही हुँदैन । अवसर सिर्जना गर्न सकिन्छ, देशभित्रै उद्यमशीलताको विकास र कृषि तथा पर्यटनमा युवालाई परिचालन गर्ने ठोस योजना ल्याउनुपर्छ ।

सन्देशः आशा जिउँदो राखौं

प्रधानमन्त्री ओलीले गरेका राम्रा कामले देशलाई नयाँ ऊर्जा दिएका छन् । तर, अझै गर्नुपर्ने धेरै काम बाँकी छन् । देशभित्रको प्रत्येक समस्याको समाधान सम्भव छ, यदि हामीले सामूहिक प्रयास जारी राख्यौं भने । आउनुस्, अबको दिनमा निराशालाई छोडी आशालाई अँगालौं । हामी सबैको प्रयासले मात्र देशलाई समृद्ध बनाउँदै भविष्य उज्यालो बनाउन सकिन्छ ।

(रोजिना नेकपा एमाले कोशी प्रदेश कमिटी युवा फाँट इन्चार्ज तथा राष्ट्रिय युवा संघ नेपाल स्थायी कमिटी सदस्य हुन् ।)