नेताहरुको कार्यविभाजन गर्न बसेको नेकपा एसको बैठक लम्बियो

काठमाडौं । नेकपा एकीकृत समाजवादीको स्थायी कमिटीको बैठक लम्बिएको छ। नेताहरुको कार्यविभाजन टुंग्याउन मंसिर २६ गतेबाट सुरु भएको बैठक आज चौथो दिनमा पनि नसकिँएको हो।

आजको बैठकमा ८ नेताहरुले पार्टीको आगामी कार्ययोजना निर्माण गर्ने विषयमा धारणा राखेको उपाध्यक्ष जगन्नाथ खतिवडाले बताए।

उनले अनुसार पाटी सुदृढीकरणका लागि आगामी कार्ययोजना बनाउने र समसमायिक परिस्थितिबारेमा बेदुराम भुसाल, रामकुमारी झाँक्री, विरोध खतिवडा, हरि पराजुली, शत्रुधन महतो, रामचन्द्र यादव, श्रीप्रसाद साह र घनेन्द्र बस्नेतले आफ्नो धारणा राखेका छन्।

भोलि बस्ने बैठकमा अध्यक्ष माधव नेपाल, महासचिव घनश्याम भुसालसहित नेताहरु भरत श्रेष्ठ, प्रमेश हमाल, धर्मनाथप्रसाद साहले बोलेर बैठक टुंग्याउने तयारी छ।

बैठकले विभागीय प्रमुख, जिल्ला इञ्चार्ज, आयोग तथा जनसङ्गठन इञ्चार्जलगायत पदमा नेताहरुलाई जिम्मेवारी दिनुका साथै पार्टी नीतिको प्रचार गर्ने, पार्टीको सुदृढीकरण गर्ने, आगामी निर्वाचनको तयारी, राजनीतिक तथा भूराजनीतिक चुनौतीलगायतको विषयमा पनि निर्णय लिने जनाइएको छ ।