एमाले कार्यालयका सचिव भीष्म भन्छन्- बालेनले चिठी बुझाउन गरेको हर्कत बेठिक छ (भिडिओ)

काठमाडौं । एमालेले शुक्रबार काठमाडौंमा आयोजना गरेको जागरण सभाका क्रममा दरबारमार्गमा फोहोर गरेको भन्दै काठमाडौं महानगरपालिकाले जरिवाना असुल्ने प्रयास जारी राखेको छ । आज महानगर प्रहरीको टोली जरिवानाको अर्को पत्र लिएर एमाले मुख्यालय पुगेको थियो ।

पार्टी कार्यालयले जागरण सभाको आयोजक उपत्यकाका काठमाडौं, ललितपुर र भक्तपुर जिल्ला कमिटी भएकाले त्यहीँ बुझाउन भन्दै पत्र बुझ्न अस्वीकार गर्‍यो ।

एमाले केन्द्रीय कार्यालय सचिव भीष्म अधिकारीले चिठी बेठिक ठाउँमा आएको बताए । मेयर बालेन शाहले स्टन्टबाजी गरेको भन्दै सामान्य प्रशासनिक कुराहरू बुझेर मात्रै काम अघि बढाउन उनले आग्रह गरे ।

अधिकारीले भने, ‘यो चिठी बेठिक ठाउँमा आइपुग्यो, यो चिठीको आयोजक नेकपा एमाले केन्द्रीय कार्यालय होइन । महानगरले सामान्य कुरा के बुझ्नुपर्छ भने को आयोजक हो भन्ने कुरा थाहा पाउनुपर्छ । यो चिठी बुझाउन यसरी जे हर्कत गरिएको छ, एकदमै बेठिक भएको छ । मेयर सावले जे कुरा गरिरहनुभएको छ, नेपालमा सायद कुनैपनि कार्यालयमा चिठी बुझाउन जाँदा यस्तो तरिकाले आइँदैन । जो आयोजक हो, आयोजकलाई लगेर चिठी बुझाउनु होला । सामान्य प्रशासनिक कुरा पनि बुझ्नुहोला । यो बिल्कुल स्टन्टबाजी हो । कार्यक्रम सकिएपछि सफा गरिएको छ । त्यो चिठी अघिल्लो दिन नै प्रिन्ट गरेर राखिएको छ । कार्यक्रम नसकिँदै चिठी मिडियामा लगिएको छ । एमालेको इतिहास हेर्नुस्, एमालेले कहिले पनि आफूले कार्यक्रम गरेको ठाउँमा फोहोर छोडेको छैन ।’

सभाको क्रममा दरबार्गमा फोहोर गरेर वातावरण प्रदूषण पारेको भन्दै महानगरले एमालेलाई एक लाख जरिवाना तोकेको छ ।