डाक्टर बोलाउने बहानामा प्रेम चलाउनेको मुद्दाको फैसला धकेलियो, अदालतमा कांग्रेस पसेको आरोप

काठमाडौं । त्रिभुवन विश्वविद्यालयका उपप्रध्यापक प्रेम चलाउनेमाथि आक्रमणको मुद्दामा फेरि अर्को रोकावट आएको छ । अन्तिम सुनवाइ सुरु भइसकेपछि न्यायधीशले डाक्टर बोलाउने आदेश दिएर फैसलालाई धकेलिदिएका छन् ।

जिल्ला अदालतका न्यायाधीश उत्तम सिलवालको इजलासमा हिजो फैसला सुनवाइ अघि बढेको थियो । हिजो बहस नसकिएपछि न्यायाधीशले मुद्दालाई हेर्दाहेर्दैमा राखे । आज बिहान ११ बजे फेरि बहस सुचारु गरे ।

प्रतिवादीतर्फका वकिलहरुले तीनजना वकिलहरु दयानाथ खरेल, शेरबहादुर केसी र योगेन्द्रबहादुर अधिकारीले आज बहस गरेका थिए । सुरुमा उनीहरुले भ्याकेटको निवेदन परेकाले सुनवाइ नै हुन नसक्ने तर्क गरे । त्यसपछि चलाउनेको उपचारमा संलग्न डाक्टरको बकपत्र नभएको भन्दै बखेडा झिके ।

प्रतिवादीका वकिलको बहस सुनेपछि न्यायाधीसले चलाउनेको उपचार गर्ने डाक्टरलाई अदालत भौतिकरुमै उपस्थित गराउने आदेश गर्दै सुनवाइ स्थगित गरिदिएका छन् । डाक्टरको बयान उल्ट्याउने चेष्टासहित कांग्रेसको डिजाइनमा आज सुनवाइ स्थगित गरिएको दावी वादी पक्षका वकिलहरुको छ । कांग्रेस उपसभापति तथा कानूनमन्त्री धनराज गुरुङले नै मुद्दामा चलखेल गरिरहेको उनीहरुले आरोप लगाएका छन् ।

त्रिवि समाजशास्त्र विभागका उपप्राध्यापक चलाउनेमाथि २०७७ साल असोज २० गते सांघातिक आक्रमण भएको थियो । सख्त घाइते अवस्थामा उनलाई मेडिसिटी अस्पतालको इमर्जेन्सीमा भर्ना गरिएको थियो । इमर्जेन्सीका चिकित्सक डा. सनित सिंहले सामान्य उपचार गरेर विशेषज्ञ डाक्टरकोमा पठाइदिए । अर्थोपेडिक डिपार्टमेन्टका डा. शिशिर लाखे नेतृत्वमा पाँच डाक्टरको टिमले उनको मेकअप फ्यूमर (कम्मरमुनिको हड्डी) को पहिलो शल्यक्रिया गरेको थियो ।

चलाउनेले दोस्रो शल्यक्रिया भने टिचिङ अस्पतालमा गरेका थिए । सो अस्पतालका डाक्टरले त्यसबेलै अदालतमा उपस्थित भएर बकपत्र दिएका हुन् । मेडीसिटी अस्पतालका डाक्टर लाखेले पनि चारवटा रिपोर्ट अदालतलाई दिइसकेका छन् । उनी आफैं उपस्थित भने भएका थिएनन् । अहिले फैसला टार्न न्यायाधीसले यसैलाई बहाना बनाएका हुन् । उनले चलाउनेको पहिलो शल्यक्रिया गर्ने डाक्टर लाखे र इमर्जेन्सीमा हेर्ने डाक्टर सिंहलाई उपस्थित गराउन आदेश दिएका छन् ।

अघि बढिसकेको फैसला सुनवाइ रद्द भएको यो तेस्रोचोटि हो । अब कहिले पेशी तोकिन्छ भन्ने टुंगो छैन । फेरि अर्को न्यायधीसको इजलासमा पर्न सक्ने भएकाले शून्यबाटै बहस सुरु गर्नुपर्ने हुन्छ । हिजो र आज घन्टौं भएको सुनवाइको कुनै अर्थ भएन ।

चलाउनले आफ्नो उपचारमा करिब १८ लाख रुपैयाँ खर्च गरिसकेका छन् । त्यसमध्ये ३ लाख रुपैयाँ त्रिभुवन विश्वविद्यालयले उपलब्ध गराएको हो भने बाँकी आफ्नै निजी खर्चबाट उपचार गराइरहेका छन् । डाक्टरहरुले उनको तेस्रो शल्यक्रिया पनि गर्नुपर्ने बताएका छन् जसका लागि १० लाख रुपैयाँभन्दा बढी लाग्छ ।

आफूमाथि आक्रामण भएको केही दिनमा नै चलाउनेले ७ जनालाई प्रतिवादी बनाएर जिल्ला अदालतमा मुद्दा दायर गरेका थिए । प्रतिवादीमध्ये ३ जना हरि आचार्य, योगेन्द्र रावल र दीपक ओझा नेविसंघका नेता हुन् । बाँकी ४ जना (रुपेश साह, रविनकुमार लावा निरज रानामगर र सरिन श्रेष्ठ पेशेवर गुण्डा हुन् । सर्वोच्च अदालतले गत ९ साउनमा यो मुद्दालाई यथासीघ्र टुंगो लगाउन जिल्ला अदालतलाई आदेश गरेको थियो । तर, जिल्ला अदालतको कार्यशैली ठीक उल्टो छ ।