ललिता निवास प्रकरणबारे रविको टिप्पणी- नम्बरी जग्गा किन्नेलाई नेल, निर्णयकर्तालाई जोगाउन जालझेल (भिडिओ)

काठमाडौं । राष्ट्रिय स्वतन्त्र पार्टीका सभापति रवि लामिछानेले संसद कसको कारणले बन्द भयो ? भन्दै प्रश्न गरेका छन् ।

करिब एक महिनापछि बसेको प्रतिनिधि सभाको बैठकमा बोल्दै उनले भने, ‘यतिका दिन यो संसद किन बन्द भयो ? कसले गर्यो ? जनताको आवाज राख्ने थलो किन बन्दभयो ? यो गम्भिर प्रश्न खडा भएको छ ।’

उनले भने, ‘सँगैको दुईवटा राष्ट्रहरु उन्नतिको चरम शिखरमा पुगेका छन् । हामी भन्दा पनि लाज लाग्छ हामी पुलिको सरुवामा आँखा लगाएर बसेका छौं । योभन्दा लज्जास्पद बिषय एउटा आर्थिक अवस्था टाँट पल्टिन लागेको मुलुकलाई के हुन्छ ?’

उनले सरकारले आफ्नो ठोकासम्म नआइपुग्दासम्म मात्रै सुशासनको कुरा गरेको टिप्पणी गरे। भुटानी शरणार्थी प्रकरणमा काम गरिरहेको प्रहरीको सरुवा गरेकोप्रति आपत्ति जनाए ।

उनले भने, ‘ललिता निवास जग्गा प्रकरणमा नम्बरी जग्गा लिएका मालपोलमा गएका कागजपत्र हेरेर पैसा दिएका मानिस र कर्मचारीहरु थुनिए । तर, निर्णयर्तालाई सुन पानी छर्कियो । यही हो सरकारको सुशासन ।’

उनले सुन प्रकरणमा पनि आफ्नो व्यक्तिको नाम आएपछि सुस्ताएको आरोप लगाए ।