बझाङ घटनाप्रति दलित आयोगको आपत्ति, कानूनी कारबाही गर्न सरकारको ध्यानाकर्षण

काठमाडौं । बझाङमा साउन १० गते गैरदलित समुदायको टोलीले पुट्के ओखेडाको निर्माणाधीन घर भत्काई भोगचलन गरिरहेको बाली नालीसमेत नष्ट गरेको घटनाप्रति राष्ट्रिय दलित आयोगले आपत्ति जनाएको छ ।

आयोगले आइतबार एक विज्ञप्ति जारी गर्दै जिल्लाको वित्थडचिर गाँउपालिका सात स्यालढुङ्गामा गैरदलितको घरमाथि दलितले घर बनाउन नमिल्ने भन्दै निर्माणाधीन घर भत्काई भोगचलन गरिरहेको बाली नालीसमेत नष्ट गरेकोमा ध्यानाकर्षण भएको आयोगले उल्लेख गरेको छ ।

आयोगले अहिलेसम्म पीडित स्वयंले नै भोकचलन गर्दै आएको जमिनमा घर निर्माण गरिरहदाँ गैर दलितको घर माथि दलितको घर बनाउन नमिल्ने भन्दै तथानाम जातीय भेदभावजन्य गाली गलौज गरी निर्माणाधीन घर भत्काउदै बालीनालीसमेत नष्ट गरेको आयोगका सदस्य एवम प्रवक्ता सुन्दर पुर्कुटीले जारी गरेको विज्ञप्तीमा उल्लेख छ । आयोगले पीडित परिवारलाई उचित क्षतिपूर्ति सहित सत्य तथ्य पत्ता लगाई दोषीलाई तत्काल कानूनी दायरामा लिई जातीय तथा अन्य सामाजिक छुवाछूत र भेदभाव (कसुर र सजाय) ऐन, २०६८ अनुसार कानूनी कारबाही गर्न सम्बन्धित निकायको ध्यानाकर्षण गरिएको प्रवक्ता पुर्कुटीले बताए ।

‘नेपालको संविधान २०७२ ले सबै नागरिक कानूनको नजरमा बराबर रहेको र कसैले पनि कुने जात, धर्म, वर्ग र क्षेत्रको आधारमा भेदभाव हुन नहुने यदि कहि कसैले प्रथा परम्पराको नाममा विभेदजन्य व्यवहार गरेको पाईएमा कानून अनुसार कारवाही गरिने गरी ऐन लागु भैसकेको अवस्थामा यसको प्रभावकारी कार्यन्वयन गरी जनताको सम्मानपूर्वक बाच्न पाउने आफ्नो सम्पत्तिको भोग चलन गर्न पाउने अधिकारको पूर्ण ग्यारेन्टी गर्न र संविधान बिरोधी घटनालाई उन्मूलन गर्न सम्बन्धित निकाय गम्भीर भई कानूनी शासनको प्रत्याभूति गराउनसमेत अनुरोध गरिन्छ ।’ आयोगले जारी गरेको विज्ञप्तीमा भनिएको छ ।