काठमाडौं । नेपाल बार एसोसियसनले ललितपुर जिल्ला अदालतकी नासु प्रेमिका तामाङले आदेशको फाइल हेर्न घुस मागेका कारण अधिवक्ता अमिर लामिछानेले इन्कार गर्दा विवाद भएको दाबी गरेको छ ।
तामाङलाई हातपात गरेको आरोपमा पक्राउ परेका लामिछानेलाई तत्काल छाड्न माग गर्दै नेपाल बारले जारी गरेको विज्ञप्तिमा नासु तामाङले घुस मागेको उल्लेख छ ।
‘ललितपुर जिल्ला अदालतमा कार्यरत नायब सुब्बा प्रेमिका तामाङले मुद्दामा भएको आदेश हेर्नलाई खर्च (घुस) मागेको विषयमा अधिवक्ता अमिर लामिछानेले इन्कारी गरेको विषयलाई अतिरञ्जितपूर्ण ढंगले घटनाको वास्तविकता र यथार्थ विवरणलाई बङ्ग्याई उल्टै अधिवक्ता लामिछानेलाई एकतर्फी दोषी देखाउने अभिप्रायले गरिएको घटना विषयप्रति नेपाल बार एसोसियसनको गम्भीर ध्यानाकर्षण भएको छ’, नेपाल बारद्वारा जारी विज्ञप्तिमा भनिएको छ ।
बारले लामिछानेलाई तत्कालै रिहा नगरे सोमबारदेखि देशभरका इजलास बन्द गर्ने चेतावनी दिएको थियो । लामिछानेलाई ललितपुर जिल्ला प्रशासनले आइतबार नै साधारण तारेखमा छाड्ने आदेश गरेको छ ।
यसअघि प्रहरीले चौतर्फी दबाबपछि अनुसन्धान प्रतिवेदन जिल्ला सरकारी वकिल कार्यालयलाई बुझाएको थियो । ललितपुर बारले प्रेमिकाले घुस मागेको भन्दै जिल्ला प्रहरीमा सोमबार बिहान जाहेरी दिएको थियो ।
Leave a Reply