सवारी साधनमा विद्यार्थीलाई छुट दिए/नदिएको बारे अनेरास्ववियु कास्कीको अनुगमन

पोखरा । विद्यार्थीले सार्वजनिक सवारीमा सहुलियत सुविधा पाए नपाएको विषयमा अनेरास्ववियु जिल्ला कमिटी कास्कीले अनुगमन गरेको छ ।

अनेरास्ववियु जिल्ला कमिटीले बिहीबार अंमरसिंङमा छोटो तथा लामो दुरीका सवारी साधनलाई रोकेर विद्यार्थीले छुट पाएको नपाएको विषयमा अनुमगन गरेको हो ।

जिल्ला कमिटी संयोजक सन्तोष पोखरेलले विद्यार्थीले सार्वजनिक सवारी साधनमा छुट नपाएको गुनासो गरेपछि अनुगमन गरिएको बताए ।

‘सार्वजनिक सवारी साधनले सरकारले निर्धारण गरेको छुट विद्यार्थीले नपाएको गुनासो गरेपछि अनुगमन गरेका हौं, विद्यार्थीलाई ६ बजेपछि र विदाको दिनमा सार्वजनिक सवारी चढ्दा परिचय पत्रका आधारमा छुट नदिइएको पाइयो,’ उनले भने, ‘विद्यार्थीले सातै दिन २४ सै घन्टा छुट पाउनुपर्छ । हामीले सचेत बनाएका छौं ।’

कमिटीले यसअघि चिप्लेढुंगा र महेन्द्रपुल क्षेत्रमा पनि सवारी साधनमा अनुगमन गरेको हो । सोमबारबाट सुरु भएको अनुगमन निरन्तर चलिरहेको अनेरास्ववियुले जनाएको छ । सवारी साधनले छुट नदिएको खण्डमा ट्राफिक प्रहरी तथा अनेरास्ववियुलाई सम्पर्क गर्न विद्यार्थीलाई आग्रह गरिएको जिल्ला कमिटी संयोजक पोख्रेलले बताए ।

विद्यार्थीहरुको परिचयपत्रको आधारमा पाउने ४५ प्रतिशत छुट कार्यान्वय नभएको भन्ने कुरा विद्यार्थीबाट आएपछि अनेरास्ववियु जिल्ला कमिटी कास्की आज चौथो दिन पनि अनुगमनमा उत्रिएको हो ।