गलत संयोगले अप्ठेरोमा परेका रवि ‘ड्यामेज कन्ट्रोल’ को प्रयासमा

काठमाडौं । भ्रष्टाचारको फाइल खोल्ने आफ्नो पार्टीको मुख्य एजेन्डा प्रचण्ड सरकारले नीति-कार्यक्रमबाट हटाएपछि असन्तुष्ट बनेको राष्ट्रिय स्वतन्त्र पार्टीले प्रधानमन्त्रीलाई दिएको समर्थन फिर्ता लियो । तर, संयोगवश रास्वपाले यो निर्णय लिनु र सरकारले नक्कली शरणार्थी प्रकरणमा ‘हाइप्रोफाइल’ हरुमाथि कारवाही थाल्नु एकैसाथ परेको छ ।

पूर्वगृहमन्त्री बालकृष्ण खाणसमेतलाई पक्राउ गरेपछि सरकारले व्यापक जनसमर्थन पाउन थाल्यो भने रास्वपामाथि सामाजिक सञ्जालमा प्रश्नहरु उठ्न थाले । यसअघि विभिन्न खराब निर्णयहरु गरिरहँदा समर्थन कायम राखेको रास्वपाले सरकार भ्रष्टाचारविरुद्ध उभिँदा किन हात छोड्यो भन्ने धेरैले प्रश्न गरेका छन् ।

रविका लागि अर्को पनि गलत संयोग पर्न गयो । खाण पक्राउ परेकै दिन बिहानै उनले प्रधानमन्त्रीमाथि प्रश्न उठाउँदै सामाजिक सञ्जालमा कडा स्टाटस पोस्ट गरेका थिए ।

उनको स्टाटस यस्तो थियोः

शिर्ष नेताहरुको तिब्र भेटघाट, फरार ९गराइएका० अझै सम्पर्क विहिन, नाम आएकाहरु माथीको अनुसंधान फितलो १११ खबरदार, अनुसंधानको लहरोले ठुला नेता र तिनका सन्तानको ूजगजाहेर तान्डवू लाई छोड्यो भने रास्वपा हेरेर मात्रै बस्दैन । यो आँधीलाई ख्याल सम्झने भुल नगर्नु होला । प्रधानमन्त्रीज्यु, एउटै फाइलले ज्वरो निकाल्यो त रु एउटा तोप पड्काउन यत्रो सकस ११

रविले यो स्टाटस बिहान ९ः३४ मा हालेका थिए । तर, उनले लेखेको केहीबेरमै प्रहरीले पूर्वगृहमन्त्री खाणलाई निवासबाट पक्रेको समाचार सार्वजनिक भयो । फलतः रवि अर्को स्टाटस पोस्ट गर्नुपर्ने वाध्यतामा परे । प्रधानमन्त्रीमाथि गम्भीर प्रश्न उठाएको १ घन्टा पनि नबित्दै उनले प्रधानमन्त्रीलाई धन्यवाद दिँदै अर्को स्टाटस लेखे ।

रविले १०ः२८ मा हालेको दोस्रो स्टाटस यस्तो थियो:

धन्यवाद नेपाल प्रहरी, धन्यवाद गृहमन्त्री ज्यु, धन्यवाद प्रधानमन्त्री ज्यु। यो शिलशिला नरोकियोस्। कुनै हालतमा नरोकियोस्।
आफ्ना स्टाटसहरमा प्रायः प्रशंसा र ताली मात्रै खान बानी परेका रविले यी दुवै स्टाटसमा थुप्रै नकारात्मक प्रतिक्रियाहरुको सामना गर्नुपरेको थियो । एकछिनमै बोली फेरेको आरोप उनलाई लाग्यो ।

भ्रष्टाचार नियन्त्रणलाई नै मुल मुद्दा बनाएको पार्टी हो रास्वपा । तर, सरकारले भ्रष्टाचारविरुद्धको ठूलो कारवाही अघि बढाउँदा रास्वपा प्रतिपक्षी बेञ्चमा बसेर टुलुटुलु हेर्न विवश बनेको छ । आफू गृहमन्त्री बन्दा नै शरणार्थी प्रकरणको लहरो तान्न सुरुवात गरेको दावी रविले गरेका छन् । तर, उनले यसमा कुनै पनि जस पाउने अवस्था छैन किनकी रास्वपाले सरकारलाई दिएको समर्थन पनि फिर्ता लिएको अवस्था छ अहिले ।

यही विरोधाभासले गर्दा दवावमा परेका रविले आज प्रधानमन्त्री पुष्पकमल दाहाल प्रचण्डलाई भेटे । भेटघाटको उद्देश्य थियो, भ्रष्टाचारविरुद्ध सरकारको कारवाहीमा ऐक्यवद्धता जनाउनु । उनले प्रधानमन्त्रीलाई खुट्टा नकमाउन आग्रह गरे ।
‘सरकारको कारवाहीमा हाम्रो पूर्ण समर्थन छ । अब सरकारले खुट्टा नकमाओस,’ उनको भनाइ उद्वृत गर्दै रास्वपा महामन्त्री तथा प्रवक्ता डा. मुकुल ढकालले भने ।

स्रोतका अनुसार रविले यदि शरणार्थी प्रकरणकै कारण भोलि सरकार अप्ठेरोमा परेको खण्डमा आफ्नो पार्टीले साथ दिने वचनसमेत दिएका छन् । यद्यपि, यो वचन तात्कालीक खपतका लागि मात्रै हो भनेर बुझ्न कठिन छैन ।

रविले उपनिर्वाचनमा शानदार विजय हासिल गरेपछि प्रचण्डले रास्वपालाई सरकारमा ल्याउन निकै जोडबल लगाएका थिए । रास्वपालाई पुरानै मन्त्रालय दिन पनि उनी तयार थिए । तर कांग्रेस सभापति शेरबहादुर देउवाको नाडी छामिसकेपछि रविले यो सरकार धेरै नटिक्ने आँकलन गरे । त्यसैले गृहमन्त्रीकै अफर पनि उनले खारेज गरिदिए । यदि अहिले नारायणकाजी श्रेष्ठको कुर्सीमा रवि लामिछाने हुन्थे र शरणार्थी प्रकरणमा प्रहरीले यसैगरि कारवाही अगाडि बढाएको हुन्थ्यो भने सबै जस रविले पाउने निश्चित थियो । उनको अभूतपुर्व हाइहाइ हुने थियो । त्यो अवसर उनले गुमाएका छन् ।

शरणार्थी प्रकरणको जस लिन नपाए पनि रवि अपजस खेप्न भने चाहँदैनन् । त्यसैले उनी विभिन्न रणनीति बनाइरहेका छन् । प्रधानमन्त्रीसँगको भेट त्यसकै एउटा उपज हुन सक्छ । उनले भोलि प्रहरीलाई धन्यवाद दिन भन्दै नक्शालको नारायणचौरमा कुनै समूहले आयोजना गर्न लागेको प्रदर्शनमा सहभागी हुने बताएका छन् । यस्तो प्रदर्शन विल्कुल अनावश्यक हो । प्रहरीले आफ्नो काम गरिरहेका बेला जेसुकै बहानामा पनि सडकमा गएर उफ्रिनुको कुनै तुक हुँदैन ।

रास्वपाका महामन्त्री तथा प्रवक्ता डा. ढकाल शरणार्थी प्रकरणमा सरकारले चालेको कदमलाई आफ्नो पार्टीले पूर्ण समर्थन गर्ने बताउँछन् । रास्वपालाई जनताले दिएको जनादेशका कारणले पनि सरकारलाई भ्रष्टाचारविरुद्ध अगाडि बढ्न प्रेसर परेको उनको विश्लेषण छ ।

‘चुनाव परिणामका कारण सरकारलाई पर्फमेन्स देखाउनैपर्ने दवाव पर्यो । तर, जेसुकै कारण भए पनि यो सवालमा सरकारलाई हाम्रो समर्थन हुनेछ,’ उनले भने ।

यद्यपि, यो अनुसन्धानले तार्किक निचोड पाउनेमा ढुक्क हुन सक्ने अवस्था नरहेको ढकाल बताउँछन् ।

उनले थपे, ‘विगतको दृष्टान्तका कारण प्रशस्त आशंकाहरु छन् । तर, त्यसो भनेर हामी अहिल्यै नकारात्मक सोच्दैनौं । सरकारलाई शंकाको सुविधा दिन चाहन्छौं ।’