दुई पूर्वप्रहरीलाई राजनीतिमा धक्का, दुवै चुनावमा जनताले पत्याएनन्

काठमाडौ । नेपाल प्रहरीमा आईजीपीसम्म बनेका सर्वेन्द्र खनालको ब्याच आम चर्चाको हिसाबले उल्लेख्य थियो । उनका ब्याजी रमेश खरेल र पुस्कर कार्की पनि सेलिब्रेटी छविका प्रहरी अधिकृत थिए । आईजीपी बन्न उनीहरूबीच अन्तिम समयमसम्म रस्साकस्सी देखिएको थियो ।

सरकारले खनाललाई आईजीपी बनाएपछि खरेलले आफूमाथि अन्याय भएको भन्दै डीआईजीबाटै राजीनामा दिए । खरेल, खनालको नेतृत्व स्वीकारेर बस्न तयार भएनन् । त्यसपछि उनले भ्रष्टाचारविरोधी अभियान सुरु गरेर राजनीतिमा प्रवेश गर्ने तयारी गरे । पछि नेपाल सुशासन पार्टी स्थापना गरे ।

यता करिब २ वर्ष प्रहरी नेतृत्व गरेर अवकाश पाएका खनाल लगत्तै राजनीतिमा आउने चर्चा चलेपनि उनको औपचारिक प्रवेश भने गत प्रतिनिधिसभा निर्वाचनको केही महिना अघि मात्र भएको थियो । तत्कालीन संसदको दोस्रो ठुलो दल नेकपा एमालेले उनलाई टिकट नै दियो । त्यो पनि राजधानी काठमाडौंकै निर्वाचन क्षेत्रमा ।

उता खरेल पनि काठमाडौंबाटै उम्मेदवार बन्ने तयारी गर्दै थिए । अन्तत उनीहरु दुवैले राजनीतिमा पहिलो परीक्षा दिए । तर दुवैलाई काठमाडौंका जनताले पत्याएनन् । वैकल्पिक राजनीतिको एजेन्डा बनाएका खरेलले पाचौं भए । उनी उठेको काठमाडौं १ बाट कांग्रेसका प्रकाशमान सिंह विजयी भए ।

हारलगत्तै खरेलले रवि लामिछानेले आफूलाई धोका दिएको आरोप लगाएका थिए । सो पार्टीले आफ्नोविरुद्ध पुकार बमलाई उम्मेदवार बनाउनुले आफू हारेको उनको विश्लेषण थियो । अहिले खरेल आफैं रविको पार्टी रास्वपामा प्रवेश गरेका छन् ।

काठमाडौं क्षेत्र–१ मा सिंहले ७ हजार १ सय ४३ मतसहित विजयी भए। राप्रपाका रविन्द्र मिश्रले ७ हजार १८, रास्वपाका पुकार बमले ४ हजार १ सय १५ पाएका थिए । प्रकाशमानभन्दा करिब ३ हजार मतले पछाडि परे खरेल ।

उता सर्वेन्द्रले पनि असफलता नै हात पारे । उनी उठेको काठमाडौं–६ मा रास्वपाका शिशिर खनाल १४ हजार २ सय २१ मतसहित विजयी भए । सर्वेन्द्रले ८ हजार ९ सय १७ मत ल्याएका थिए ।

तीन स्थानमा उपनिर्वाचन हुने भएपछि सर्वेन्द्र र रमेश दुवैलाई यो संसद प्रवेश गर्ने अर्को मौका आयो । रमेशले आफ्नो पार्टीलाई रास्वपामा गाभ्ने निर्णय गर्दै सोही पार्टीबाट बारा–२ को उम्मेदवार बने ।

हालका राष्ट्रपति रामचन्द्र पौडेलले गत निर्वाचन जितेको तनहुँ–२ मा एमालले सर्वेन्द्रलाई फेरि टिकट दियो । तनहुँ सर्वेन्द्रको गृह जिल्ला भएका कारण प्रहरीमा रहँदा उनको असल छविका कारण जित्न सक्ने एमालेको विश्वास थियो ।

तर यी दुवै पूर्वप्रहरी जर्साब लगातार दोस्रोपटक जनताबाट अस्वीकृत भएका छन् । बारामा रमेशले केवल २ हजार ८ सय २९ मत पाए भने निर्वाचित भएका जनता समाजवादी पार्टीका उपेन्द्र यादबलाई २८ हजार ४ सय १५ ल्याएका थिए । गत निर्वाचनमा नेपाल सुशासन पार्टीले एक सय ५० मत मात्र प्राप्त गरेको निर्वाचन क्षेत्रमा गएर रमेशले आफ्नो परिक्षा दिने निर्णय गरेका थिए ।

तर रवि क्रेजको असर त्यहाँ देखिएन । संसदको दोस्रो ठुलो पार्टी र गृह जिल्ला भएकाले जनताले आफुलाई पत्याउँछन् भनेर तनहुँ पुगेका सर्वेन्द्रले पनि रमेशकै नियति ब्यहोरे । चुनावी नतिजाबारे सर्वेन्द्रले सार्वजनिकरुपमा कुनै प्रतिक्रिया जनाएका छैनन् ।

रमेशले चाहीँ भनेका छन्, ‘निर्वाचनको परिणाम जस्तोसुकै आएको भएता पनि म इमान्दारीतापूर्वक नेपाल आमा र नेपाली दिदीबहिनी तथा दाजुभाईहरुको सेवामा लागि नै रहनेछु ।’