विवेकशील साझामा फर्किँदै मिलन पाण्डे, माघ २७ मा महाधिवेशन हुने

काठमाडौं । विवेकशील साझा पार्टीले महाधिवेशनको तयारी थालेको छ। माघ २७ र २८ गते महाधिवेशन गर्नेगरी तयारी थालेको हो। पार्टीभित्रको विवादको क्रममा अध्यक्ष रविन्द्र मिश्रले कारवाही गरेको नेता मिलन पार्टी फेरि सक्रिय भएका हुन्।

अध्यक्ष मिश्र राष्ट्रिय प्रजातन्त्र पार्टी (राप्रपा) प्रवेश गरेपछि पार्टीको सक्रिय राजनीतिमा पाण्डे फर्किएका हुन्। पार्टीलाई अझ प्रोग्रेसिभ, अझ लोकतान्त्रिक, अझ भविष्यमुखी, थप युवामुखी बनाउनुको विकल्प नेता पाण्डेले बताए।

उनले आइतबार एक विज्ञप्ति जारी गर्दै भनेका छन्, ‘गत एक दशकमा हामीले संस्था निर्माण गर्न, यो आन्दोलनलाई स्थापित गर्न गरेको योगदान र मेहनतलाई अर्को चरणमा पु¥याउन हामी आउँदो माघ २७–२८ गते महाधिवेशन गर्ने तयारीमा जुटेका छौँ। आउँदो महाधिवेशनले विवेकशील साझा पार्टीलाई थप संस्थागत गर्नेछ भन्नेमा म ढुक्क छु।’

आफूहरुसँग छुटेका र विचार मिल्ने पार्टीहरूसँग पनि संवादमा रहेको उल्लेख गर्दै केहि नतिजाहरू महाधिवेशन अघि, केहि नतिजाहरू महाधिवेशनपछि देखिने बताए। उनले पार्टीका पूर्वअध्यक्ष मिश्रलाई संकेत गर्दै संविधानलाई भत्काउने विचार ल्याएपछि पार्टीमा दुई वैचारिक धार देखिएको उल्लेख गरेका छन्।

‘हामीले उक्त विचारलाई त्यतिबेलानै खारेज गर्दै सङ्घर्ष ग¥यौँ। उक्त निर्णयको विरुद्ध अदालत गयौँ। तर, पार्टीको स्थापनाको विचार र मर्मलाई गलत धारमा जान दिएनौँ। हामीले यो वैचारिक द्वन्द्व पार्टीभित्रको द्वन्द्वका रूपमा मात्र हेरिरहेका थिएनौँ, यसले राष्ट्रिय राजनीतिमा पार्ने प्रभावको रूपमा पनि हेरिरहेका थियौँ’ उनले भनेका छन्।

विवेकशील सदनमा नभएपनि नागरिकको मुद्दाका निम्ति सडकबाट प्रतिपक्षको भूमिका निर्वाह गर्ने बताएका छन्।

‘हामी सिङ्गो सिंहदरबारलाई खबरदारी गर्नेछौँ। विवेकशील साझा पार्टीलाई नयाँ सिराबाट अघि बढाउने छौँ’ उनले भनेका छन्, ‘यही पत्र मार्फत सम्पूर्ण साथीहरूलाई एक ठाउँमा आएर काम गर्न समेत अनुरोध गर्दछु। देशले स्पष्ट, जरैबाट उठेको वैकल्पिक शक्ति खोजिरहेको छ। हामी त्यो शक्ति हौँ। बन्न सक्छौँ।’