काठमाडौं । निर्वाचन आयोगले पर्सा जिल्लास्थित आचारसंहिता अनुगमन अधिकृतका रूपमा रहेका प्रमुख कोष नियन्त्रक रुद्रबहादुर कार्कीलाई उम्मेदवारले धम्की दिएको भन्दै उनलाई आवश्यक सुरक्षा व्यवस्था गर्न प्रहरीलाई पत्राचार गरेको छ । पर्साको निर्वाचन क्षेत्र नं ४ का प्रतिनिधिसभा सदस्यका नेपाली काँग्रेसका उम्मेदवार रमेश रिजालले अधिकृत कार्कीलाई धम्की दिएको भन्दै आयोगले जिल्ला प्रहरी कार्यालय, पर्सालाई पत्राचार गरेको हो ।
रिजालले कार्कीलाई फोनमार्फत धम्की दिएको तथा गालीगलौज गरेको भन्ने लिखित उजुरी आयोगमा परेपछि कार्कीको आवश्यक सुरक्षा प्रबन्ध तत्काल मिलाइ उम्मेदवार रिजालका आचारसंहिता विपरीतका गतिविधि उपर आवश्यक निगरानी गरी आयोगमा प्रतिवेदन पेश गर्न आयोगले प्रहरीलाई पत्राचार गरेको हो ।
निर्वाचन (कसुर तथा सजाय) ऐन, २०७३ को दफा २ को उपदफा १ को खण्ड घ अनुसार निर्वाचनमा संलग्न कर्मचारीलाई धाक, धम्की वा डर, त्रास देखाउन हुँदैन । सोही ऐनको उपदफा ४ मा त्यस्तो कसुर गर्ने व्यक्तिलाई एक लाख रुपैयाँसम्म जरिवाना वा दुई वर्षसम्म कैद वा दुवै सजाय हुने व्यवस्था छ ।
आयोगले ती व्यवस्थाका साथै निर्वाचन आचारसंहिता, २०७९ को दफा ४ को खण्ड ढ मा निर्वाचनको विश्वसनीयतामा वा आयोग, आयुक्त वा कर्मचारीको प्रतिष्ठानमा प्रतिकूल असर पर्ने गरी कुने अवाञ्छित लाञ्छना लगाउन नहुने व्यवस्थाबारे स्मरण गराएको छ । सो दफाको खण्ड ण मा कसैको चरित्र हत्या गर्न, व्यक्तिगत लाञ्छना लगाउन, मानहानी गर्न वा यस्तै प्रकृतिका सामग्री कुनै स्वरुपमा उत्पादन गर्न तथा त्यस्ता सामग्री कुनै माध्यमबाट प्रकाशन वा प्रसारण गर्न नहुने व्यवस्था रहेको छ ।
Leave a Reply