जग्गा संरक्षण गर्दा स्काउटमा वडाध्यक्ष र डिएसपीको दबाब, पूर्वमन्त्रीको कार्यालयमा बैठक

काठमाडौं । वर्षौँदेखि नेपाल स्काउटको सम्पत्ति अवैध कब्जा गरेर बसेका पूर्वमन्त्री दीपक खड्काले सत्ताको दुरुपयोग गर्दै संस्थाको दैनिक प्रशासनिक काममा अवरोध सिर्जना गरेका छन् ।

खड्काले वडा नम्बर २६ का वडाध्यक्ष ख्याम तिवारी र सोह्रखुट्टे प्रहरी प्रमुखलाई दबाब दिएर स्काउटका दैनिक काममा अवरोध सिर्जना गर्न खोजेको संस्थाका पदाधिकारीहरूले बताएका छन् ।

असार ५ गते नेपाल स्काउट स्थापना दिवसको अवसरमा आयोजित कार्यक्रममा स्काउटले आफ्नै जग्गामा रहेको मञ्चको सरसफाइ तथा रंग रोगन गर्दै खाल्डाखुल्डी पुर्न काम गरेको थियो ।

स्काउटको जग्गामै रहेको पार्टी प्यालेसले पार्किङका रूपमा प्रयोग गरेको जग्गाको केही भागमा तारबार लगाएर स्काउट दिवस मनाइएको थियो ।

सोही तारबारलाई लिएर स्काउटका कर्मचारीलाई अनावश्यक दबाब दिन थालिएको संस्थाले जनाएको छ ।

स्काउटको कार्यालय र जग्गा काठमाडौं महानगरपालिका वडा नम्बर २६ मा पर्छ । कांग्रेस नेता समेत रहेका खड्का ल्याण्ड डेभलपर्सका मालिक दीपक खड्काले वडाध्यक्ष तिवारीमार्फत स्काउटमा अवरोध सिर्जना गर्न खोजेको आरोप छ ।

तिवारीले स्काउटको कार्यालय बन्द रहेको समयमा फोन गरेर तारबार लगाइएको जमिनका पोलहरू उखेलेर फाल्न निर्देशन दिएका छन् । तिवारी यसबारेमा बुझ्न खोज्दा सम्पर्कमा आएनन् ।

पूर्वमन्त्री खड्काको कम्पनी खड्का ल्याण्ड डेभलपर्सले स्काउटलाई करोडौँ रुपैयाँ भाडा तिर्न बाँकी रहेको छ । यता खड्का समूहले स्काउटका पूर्व पदाधिकारीसँग सोही जमिन कब्जा गर्ने योजनासहित भेला समेत आयोजना गरेका छन् ।

मंगलवार पूर्व पदाधिकारीहरू पूर्व प्रमुख आयुक्त रविन दाहाल, पूर्व राष्ट्रिय संयोजक चन्दन कौशिक, देवदूत अधिकारी, दिपेश केसी, पुन्यराम गोथे, तरुण रन्जन दत्त लगायतका व्यक्तिहरू लैनचौरस्थित खड्काल्याण्डको कार्यालयमा पुगेका थिए ।

खड्काले स्काउटको जग्गा हत्याउन प्रहरी प्रशासनमाथि समेत राजनीतिक दबाब दिएका छन् । सोह्र खुट्टे वृत्तमा डिएसपीले स्काउट कार्यालय लैनचौर पुगेर विवादित जग्गामा एकलौटी नगर्न भन्दै दबाब दिएको बताइएको छ ।

नेपाल स्काउटको जग्गालाई विवादित बनाएर हत्याउन वडाध्यक्ष र प्रहरीलाई समेत प्रयोग गर्न खोजिएको आरोप छ । जबकि पार्किङ क्षेत्रको जग्गामा कुनै विवाद छैन । स्काउटले वार्षिक कार्यक्रम गर्न जग्गाका केही भागमा तारबार लगाएको थियो ।

२०७२ सालको भूकम्पपछि उक्त स्थानमा स्काउटको कार्यक्रम भएको थिएन । यस पटक आफ्नै जग्गामा कार्यक्रम गर्न मञ्च निर्माण तथा सरसफाइमा मितव्ययिता अपनाउन खोज्दा स्काउटको जग्गालाई विवादित बनाउन खोजिएका निर्देशक रामप्रसाद भट्टराईले बताए ।

स्काउटमा यस्ता घटना भने भइरहेका छन् । केही समयअघि पूर्वमन्त्री खड्काकै नेतृत्वमा एउटा समूह स्काउट कार्यालयमा पसेर लुटपाट र तोडफोड गरेको थियो । प्रहरीले त्यस बेला किटानी जाहेरी समेत नलिएको स्काउटको भनाइ छ ।