मेक्सिको सिटी । मेक्सिको सिटीको संसद (कांग्रेस) भित्र प्रत्यक्ष सत्रकै क्रममा सांसदहरूबीच रडाको मच्चिएको छ । सांसदहरू कपाल लुछालुछ र हातपातमा उत्रिएका छन् ।
पारदर्शिता तथा निगरानी निकायसम्बन्धी विधेयकमाथि भइरहेको बहस अचानक हिंसात्मक झगडामा परिणत भएपछि संसद भवन केही समय अव्यवस्थित बनेको थियो ।
घटना संसदको प्रत्यक्ष प्रसारण भइरहेकै बेला भएको हो । भिडियो फुटेजमा महिला सांसदहरूबीच एक–अर्काको कपाल तान्दै, धकेलाधकेल गर्दै र हातपातमा उत्रिएको दृश्य देखिन्छ ।
केही पुरुष सांसदहरू पनि झगडा छुट्याउने प्रयासमा देखिएका छन् । उक्त दृश्य सामाजिक सञ्जालमा तीव्र रूपमा भाइरल बनेको छ र मेक्सिकोको संसदीय मर्यादामाथि गम्भीर प्रश्न उठेको छ ।
स्थानीय सञ्चारमाध्यमका अनुसार विपक्षी दल नेशनल एक्सन पार्टीका सांसदहरूले पारदर्शिता निगरानी निकायसम्बन्धी प्रस्तावप्रति आपत्ति जनाउँदै संसदको पोडियम घेरेका थिए । त्यसपछि सत्तारूढ दल मोरेनाका सांसदहरूले पोडियम नियन्त्रणमा लिन खोज्दा दुवै पक्षबीच चर्को विवाद चुलिएको थियो । विवाद बढ्दै जाँदा बहस हातपातमा परिणत भएको बताइएको छ ।
झगडाका क्रममा केही सांसदहरू घाइते भए पनि गम्भीर चोट लागेको विवरण सार्वजनिक भएको छैन । सुरक्षाकर्मीहरूले हस्तक्षेप गरी स्थिति नियन्त्रणमा लिएका थिए भने केही समयका लागि संसदको कार्यवाही स्थगित गरिएको थियो ।
विपक्षी दलले आफूहरूले शान्तिपूर्ण रूपमा विरोध जनाएको दाबी गर्दै सत्तारूढ पक्षले बल प्रयोग गरेर हटाउन खोजेको आरोप लगाएको छ । सत्तारूढ दलका सांसदहरूले भने विपक्षी सांसदहरूले संसदीय नियम उल्लङ्घन गर्दै अराजक व्यवहार देखाएको प्रतिक्रिया दिएका छन् ।
यस घटनापछि मेक्सिकोमा संसदीय आचरण, राजनीतिक ध्रुवीकरण र लोकतान्त्रिक मर्यादाबारे व्यापक बहस सुरु भएको छ । सामाजिक सञ्जाल प्रयोगकर्ताहरूले संसदलाई ‘लोकतन्त्रको मञ्च’ भन्दै यस्ता हिंसात्मक गतिविधिले जनप्रतिनिधिको छवि धुमिल बनाएको टिप्पणी गरेका छन् ।
विश्लेषकहरूका अनुसार मेक्सिको सिटीको संसदमा देखिएको यो दृश्य पछिल्लो समय विश्वभर बढ्दो राजनीतिक ध्रुवीकरणको प्रतीकका रूपमा पनि हेरिएको छ। संसद सचिवालयले घटनाको छानबिन गरी आवश्यक कारबाही गर्ने जनाएको छ।
Leave a Reply