काठमाडौं । लगानी बोर्डका प्रमुख कार्यकारी अधिकृत सुशील ज्ञवालीले नेपालमा थप लगानी गर्न चिनियाँ लगानीकर्ताहरूलाई आग्रह गरेका छन् । नेपालमा लगानीका लागि वृहत् अवसर रहेको उल्लेख गर्दै उनले थप लगानी गर्न भनेका हुन् ।
नेपाल चीन लगानीसम्बन्धी काठमाडौंमा आयोजित कार्यक्रममा प्रमुख कार्यकारी अधिकृत ज्ञवालीले नेपालमा ऊर्जा, कृषि, पर्यटन, सूचना प्रविधि, पूर्वाधार, सडक, औद्योगिक लगायतका क्षेत्रहरूमा लगानीका लागि धेरै सम्भावना रहेको र बजारका हिसाबले नेपाल दक्षिण एसियाको गेटवे बन्न सक्ने धारणा व्यक्त गरे ।
लगानीका लागि नेपाल आकर्षक गन्तव्य रहेको उल्लेख गर्दै उनले रोजगारी सिर्जना गर्न र दीर्घकालीन रूपमा साझेदारी निर्माणका लागि पनि चिनियाँ लगानीले सहयोग पुग्ने बताए ।
वैदेशिक लगानीलाई थप सहजीकरण गर्न लगानी बोर्डले एकद्वार सेवा केन्द्र, परियोजना प्रस्तावहरूको द्रुत स्वीकृति, संस्थागत सुदृढीकरण, नीतिगत सुधार लगायतलाई विशेष जोड दिएको उल्लेख गर्दै प्रमुख कार्यकारी अधिकृत ज्ञवालीले नेपाललाई भरपर्दो, प्रतिस्पर्धी र नवप्रवर्तनमा आधारित लगानी गन्तव्यको रूपमा स्थापित गर्नका लागि लगानी बोर्डले काम गरिरहेको जानकारी दिए ।
प्रमुख कार्यकारी अधिकृत ज्ञवालीले लगानीका लागि सहजीकरण गर्न र आयोजना कार्यान्वयनका क्रममा आइपर्ने समस्याहरूलाई समाधान गर्न लगानी बोर्डले अभिभावकको भूमिका निर्वाह गर्ने पनि बताए ।
नेपालमा चिनियाँ लगानीसम्बन्धी कार्यक्रम चाइनिज जनरल एशोसियसन अफ इन्डस्ट्रिज एण्ड कमर्स इन नेपाल र नेपाल चेम्बर अफ कमर्सको आयोजनामा भएको थियो ।
कार्यक्रममा कृषि, उद्योग, सूचना प्रविधि, निर्माण क्षेत्र, पर्यटन लगायतका क्षेत्रमा अनुभव प्राप्त चिनियाँ लगानीकर्ताहरूको सहभागिता रहेको थियो ।
Leave a Reply