काठमाडौँ । नेकपा एमालेले १० औँ महाधिवेशनपछि शसक्त रुपमा कार्यकर्तालाई वैचारिक, सैद्धान्तिक, संगठनात्मक, सामाजिक रुपमा प्रशिक्षित गर्न पार्टी स्कूल विभागलाई सक्रिय गरायो । नेता कार्यकर्तामा वैचारिक विचलन,आफूले आदर्श मानेको मार्क्सवाद, लेनिनवाद र जनताको बहुदलीय जनवादका बारेमा कतिपय नेताहरुमै आधारभूत ज्ञान नहुँदा नयाँ कार्यकर्तालाई विचारले प्रभावित पार्ने विषय कमजोर भएकोले यो विभागलाई थप सक्रिय बनाइएको एमालेले जनाएको छ ।
महाधिवेशन सकिएको ३ महिनापछि १९ माघ २०७८ मा उपमहासचिव प्रदीप ज्ञवालीलाई यस विभागको प्रमुख बनाउने निर्णय एमालेले गरेको थियो । ज्ञवालीका अनुसार चार वर्षको अवधीमा विभिन्न तहका ७ हजार ७ सय ८३ जना नेता कार्यकर्तालाई प्रशिक्षित गरिएको छ ।
स्कूल विभागले तयार गरेको प्रतिवेदन अनुसार प्रशिक्षणमा जनसंगठन देखि प्रवाससम्म जनप्रतिनिधिदेखि नवप्रवेशीसम्मका नेता कार्यकर्तालाई प्रशिक्षण दिइएको उल्लेख छ । प्रतिवेदन अनुसार चार वर्षको अवधिमा जनसंगठनतर्फ ६ सय २५, प्रदेशस्तरीय प्रशिक्षक प्रशिक्षण ४ सय ८, स्थानीय तहका जनप्रतिनिधि ६ सय ५६ जनालाई प्रशिक्षण दिइएको छ । यस्तै नवप्रवेशी २ सय ५०, जिल्ला तहका नेता कार्यकर्ता ५ हजार ४ सय २६, वित्त तथा कोष व्यवस्थापन ५६, भारत प्रवास ५६ जनालाई प्रशिक्षित गरिएको छ ।
‘यसबीचमा हामीले हुम्ला देखि पाँचथरसम्म, झापादेखि कञ्चनपुरसम्म गरी ६६ वटा भौगोलिक प्रशिक्षक सञ्चालन गर्यौं,’ ज्ञवालीले भने, ‘‘हामीले ३–४ दिनका कार्यशाला, अन्तरक्रियात्मक शैली, अनुभवी र विज्ञ प्रशिक्षकबाट प्रशिक्षण दिइएको हुनाले धेरै कार्यकर्ताले पार्टीको आधारभूत सिद्धान्त र मान्यताबारे स्पष्ट हुनुभएको छ ।’
विभागका सचिव घनश्याम कोइरालाका अनुसार पार्टी केन्द्रको स्कूल विभागले माध्यमिक तहको प्रशिक्षण सञ्चालन गर्ने गरेको छ । विभागले उत्पादन गरेका प्रशिक्षकहरु प्रदेश,जिल्ला र स्थानीय तहहरुले आयोजना गर्ने प्रशिक्षणका काम गरिरहेका छन् । ‘हामीले बृह्त्तर रुपमा प्रशिक्षणको काम अघि बढाएका हौँ । केन्द्रले प्रशिक्षक उत्पादन गर्ने,प्रदेश र जिल्ला र स्थानीय तहले उनीहरु मार्फत सम्बन्धित तहका कार्यकर्तालाई पार्टी,समाज,देश र विदेशका बारेमा थाहा पाउन मद्धत गरिरहेका छन्,’ कोइरालाले भने ।
विभागले सातै प्रदेशमा स्थायी स्कूल सञ्चालन गर्ने तयारी गरेको छ । जस अनुसार केन्द्रको स्कूल विभाग मदन आश्रित स्मृति भवन गोठाटारमा,कोशीमा मदन भण्डारी स्मृति प्रतिष्ठान इटहरामा, मधेशको मदन आश्रित स्मृति भवन लालबन्दीमा, गण्डकीको पुष्पलाल स्मृति प्रतिष्ठान पोखरामा, लुम्बिनीको नेपालगञ्ज, देउखुरी र बुटवलमा र सुदूरपश्चिमको कञ्चनपुरस्थित जिल्ला पार्टी कार्यालयमा स्थायी स्कूलको संरचना तयारी थालेको छ । विभागले आधारभूत तहको पाठ्यक्रमका लागि समृद्धि सोपान स्रोत पुस्तक पनि तयार गरेको छ ।
Leave a Reply