एमालेको एघारौँ महाधिवेशनलाई ओलीको निरंकुश नेतृत्वबाट मुक्त गर्ने अवसरका रूपमा लिन भीम रावलको सुझाव

काठमाडौँ । नेकपा (एमाले)का पूर्व उपाध्यक्ष तथा नेपाली कम्युनिष्ट पार्टी (नेकपा)का नेता डा.भीम रावलले पार्टीको एघारौँ महाधिवेशनलाई ‘निरंकुश, स्वेच्छाचारी र सिद्धान्तहीन’ नेतृत्वबाट मुक्त हुने ऐतिहासिक अवसरका रूपमा उपयोग गर्नुपर्ने सुझाव दिएका छन् । सामाजिक सञ्जाल फेसबुक तथा ट्विटरमार्फत उनले केही दिनयता एमालेका नेताले आफ्नो नाम बारम्बार लिएको प्रसंग उठाउँदै, आफूले उठाएको प्रश्न र आवाजलाई तोडमोड गरी ‘पार्टी छोडेको’ जस्तो भ्रम फैलाइएकामा गम्भीर आपत्ति जनाएका छन् ।

आफ्नो धारणा सार्वजनिक गर्दै नेता रावलले एमालेभित्र आफूलाई विधि, पद्धति, स्वाधीनता, स्वाभिमान र दृढताको प्रतीकका रूपमा प्रस्तुत गरिएको सुन्दा खुशी लागेको बताए । उनले दशौँ महाधिवेशनको समयमा नै केपी शर्मा ओलीको ‘निरंकुश र स्वेच्छाचारी’ शैलीबिरुद्ध आवाज उठाएको स्मरण गराउँदै अहिले धेरै नेताले सोही मुद्दा एघारौँ महाधिवेशनमा उठाउन थालेको उल्लेख गरे ।

उनका अनुसार पार्टीको आन्तरिक लोकतन्त्र, प्रतिस्पर्धा र जनताको बहुदलीय जनवादका मूल्यमान्यतासँग मेल खाने पद्धति स्थापित गर्न आफू सदैव अडिग रहे पनि, यो विचारबाट ‘त्रसित’ ओली पक्षले आफूलाई संगठनबाट व्यवस्थित ढंगले बाहिर धकेलेको हो ।

रावलले केही व्यक्तिले आफ्नो पहिल्यै उठाएको विषयलाई तोडमोड गर्दै आफू पार्टी छोडिसकेको प्रकारका भ्रमपूर्ण व्याख्या गरिरहेकोमा आश्चर्य व्यक्त गरेका छन् । उनले लेखेका छन्, ‘मेरो आवाजलाई गलत अर्थ्याएर पार्टी नै छोडेँ भन्ने भ्रामक कथा बनाइएका छन्, तर वास्तविकता के हो भने ओली गुटले मेरो सदस्यता स्वेच्छाचारी ढंगले खोसेको हो ।’

रावलका अनुसार एमालेबाट अलग हुनु आफ्नो इच्छा वा अडानका कारण होइन, बरु विधि र पद्धतिबारे उठाएको प्रश्नबाट डराएको नेतृत्वले बुनेको योजनाबद्ध कदम हो । यतिबेला एमालेभित्र विभिन्न नेतृत्व तहका नेताले एघारौँ महाधिवेशनमा संगठनमा देखिएको ‘एकल वर्चस्व’ र ‘संगठित असन्तुष्टि’ बारे गम्भीर बहस चलाएका छन् । रावलले यो प्रसंगलाई जोड्दै भनेका छन्, ‘दसौँ महाधिवेशनमा मैले उठाएको मुद्दा अहिले फेरि उठिनुमा एउटा तथ्य छ, पार्टीभित्र विधि, पद्धति र स्थापित मान्यतालाई नेतृत्वले निरन्तर अवमूल्यन गर्दै आएको छ ।’

उनका अनुसार पार्टीको आन्तरिक लोकतन्त्र कमजोर हुँदा नेताको आवाज दबिन्छ, प्रतिस्पर्धा हराउँछ र सिद्धान्तभन्दा व्यक्ति केन्द्रितता बढ्छ, जुन अहिले एमालेमा प्रत्यक्ष देखिएको अवस्था हो ।