काठमाडौं । व्यवसायी तथा राजसंस्थावादी अभियन्ता दुर्गा प्रसाईँ प्रधानमन्त्रीसँग वार्ता गर्न सिंहदरबार पुगेका छन् । उनी आफ्नो सुरक्षा दस्ताको दलबलसहित गएका हुन् ।
सिंहदरबार प्रवेशपछि सञ्चारकर्मीहरूले उनलाई घेरेका थिए । प्रसाईँले आफू राजसंस्था र हिन्दू राष्ट्रको पुनर्स्थापना लगायतका मागहरू प्रधानमन्त्रीसँग राख्ने बताए ।
प्रधानमन्त्री जसरी नै दलबलसहित आउनु भयो त ? भन्ने एक सञ्चारकर्मीको प्रश्नमा उनले जवाफ दिए- एउटा सरकार बाहिर पनि छ भन्ने थाहा छैन ?’
प्रसाईँले २०६२/६३ मा जनआन्दोलनमा धर्मनिरपेक्ष र संघीयता ल्याउने तथा राजसंस्था हटाउने म्यान्डेट नरहेको बताए । त्यो गल्ती अहिलेको सरकारले सच्याउनुपर्ने उनको भनाइ थियो ।
‘हिजो प्रचण्डहरूले पनि बालुवाटारमा आए ? गणतन्त्र मागेका हुन् । आज म पनि माग्न आएको हो । हिजो प्रचण्डहरूले गणतन्त्रका लागि सशस्त्र विद्रोह गरे । हामी राजसंस्थाका लागि निःशस्त्र विद्रोह गर्छौँ ।’ उनले भने ।
Leave a Reply