शंकर पोखरेलको आग्रह–पार्टीमा प्रतिस्पर्धा होइन एकताको खाँचो छ, ओलीकै नेतृत्वलाई स्वीकारौँ

काठमाडौं । नेकपा एमालेका महासचिव शंकर पोखरेलले ११ औँ महाधिवेशनपछि पार्टी सुदृढ र एकताबद्ध हुने दाबी गरेका छन्।

पार्टीको नवयुग ई–बुलेटिन शुभारम्भ कार्यक्रमलाई सम्बोधन गर्दै मंसिर २७ गते हुने उद्घाटन समारोहमा सहभागी हुने अपिल गरे।

उनले भने, ‘भक्तपुरको सल्लाघारीमा उद्घाटन समारोहको आयोजना गरेका छौँ। त्यो उद्घाटन समारोहलाई प्रतिगमनविरुद्धको जनपरिचालनको रूपमा र महाधिवेशनको उत्सवको रूपमा हामीले प्रस्तुत गर्छौँ।’

उनले एमालेबाट मात्रै देश विकासको योजना बन्नसक्ने दाबी गरे।

उनले भने, ‘पार्टी अध्यक्ष ओलीमाथि चौतर्फी प्रहार भइरहेको छ। यो उहाँमाथि मात्रै होइन, एमाले, एमालेले अघि सारेको नीति र नेपाललाई कमजोर बनाउन गरिएको आक्रमणको रूपमा हामीले लिनुपर्छ।’

राष्ट्रिय राजनीतिक एमाले र ओलीकै वरिपरि घुमिरहेको जिकिर गर्दै आगामी महाधिवेशनबाट ओली नै अध्यक्ष हुने बताए।

उनले अध्यक्षमा ओलीसँग प्रतिस्पर्धा गर्ने घोषणा गरेका वरिष्ठ नेता ईश्वर पाेखरेल समूहलाई लक्षित गर्दै उनले भने, ‘अहिले पार्टीमा प्रतिस्पर्धा होइन, एकताको खाँचो छ, एकताबद्ध ओलीको नेतृत्वमा अघि बढौँ।’