भोजपुर एमालेकाे निलम्बनमा रहेका कृपाशुरले भोजपुरमै आएर ७५० विद्यार्थीलाई बाँडे ज्याकेट

भोजपुर । पूर्वपर्यटनमन्त्री कृपाशुर शेर्पाले ७५० विद्यार्थीहरूलाई ज्याकेट वितरण गरेका छन् । एमाले भोजपुरले गरेको निलम्बनको निर्णय सेलाउन नपाउँदै शेर्पा सामाजिक काम लिएर यहाँ आउनुलाई धेरैले अर्थपूर्णरूपमा लिएका छन् ।

तर, उनले सेवा र सहायता नै आफ्नो परिचय भएको भन्दै यसमा कुनै राजनीतिक उद्देश्य नरहेको बताए । एक वर्षजति अघि लेखेको एउटा स्टाटसलाई लिएर शेर्पालाई कारबाही गरिएको छ । उनले आफूमाथि शेरधन राईले प्रतिशोध साँधेको आरोप लगाएका छन् ।

रामप्रसाद राई गाउँपालिका- ५ मानेभन्ज्याङ्ग र ६ नम्बर बैकुण्ठेको बेहेरेश्वर र शावित्रा मावि साथै आसपासका आधारभूत विद्यालयका विद्यार्थीहरूलाई उनले ज्याकेट वितरण गरेका हुन् ।

आफ्नो पहलमा सोवर्स एक्सन नेपालले ३६ लाख ७५ हजार मूल्य बराबरको ज्याकेट उपलब्ध गराएको उनले सुनाए । विद्यार्थीहरूलाई ज्याकेट वितरण समारोहमा जनप्रतिनिधि, स्थानीय अगुवाहरू सहभागी थिए ।