उमेरहदले विद्यार्थी संगठनबाट बाहिरिएका सञ्जीव धिताल एमाले महाधिवेशनका प्रतिनिधि बने

काठमाडौं । उमेर हद्दका कारण विद्यार्थी संगठनबाट बाहिरिएका अनेरास्ववियुका पूर्व सचिव सञ्जीव धिताल नेकपा (एमाले) को ११औँ राष्ट्रिय महाधिवेशनका लागि नेशनल भोलिन्टियर फोर्स मार्फत महाधिवेशन प्रतिनिधिमा चयन भएका छन् ।

अनेरास्ववियुको २४औँ राष्ट्रिय महाधिवेशन पूर्व नेकपा एमालेले ३२ वर्षे उमेर हद लगाएपछि महासचिव पदका बलिया उम्मेदवार मानिएका धिताल विद्यार्थी राजनीतिबाट बाहिरिन बाध्य भएका थिए ।

सिन्धुपाल्चोकका स्थायी बासिन्दा धितालले २०६५ सालमा देशकै जेठो क्याम्पस त्रिचन्द्रबाट विद्यार्थी राजनीतिको यात्रा सुरु गरेका थिए ।

अखिल त्रिचन्द्रको अध्यक्ष हुँदै उनी केन्द्रीय कमिटी सदस्य, सचिवालय सदस्य हुँदै काठमाडौंमा सम्पन्न २३औँ राष्ट्रिय महाधिवेशनबाट सचिवमा निर्वाचित भएका थिए ।

त्यसपछि सङ्गठनले उनलाई कर्णाली प्रदेश इन्चार्जको जिम्मेवारी दिएको थियो । उनको नेतृत्वमा कर्णाली प्रदेश कमिटीसहित दशवटै जिल्लाका अधिवेशन सर्वसम्मत रूपमा सम्पन्न भएका थिए ।

नेकपा एमालेले मंसिर ५ गते गठन गरेको नेशनल भोलिन्टियर फोर्समा धिताललाई केन्द्रीय कमाण्डका सेक्रेटेरियट कमाण्डरको जिम्मेवारी दिइएको छ ।