खड्काले महाधिवेशनको कार्यतालिका ल्याउन खोजेपछि असन्तुष्ट संस्थापन पक्षका नेताहरूले देउवालाई भेटे

काठमाडौं । सभापति शेरबहादुर देउवाकै परामर्शमा कार्यवाहक सभापति पूर्णबहादुर खड्काले ल्याउने तयारी गरेको महाधिवेशनको प्रस्तावमा संस्थापन पक्षका नेताहरूले नै असहमति जनाएका छन्।

पूर्वउपसभापति विमलेन्द्र निधि, पूर्वमहामन्त्री कृष्ण सिटौलासहित नेताहरूले असन्तुष्टि जनाएका छन्। खड्काले आज बस्ने बैठकमा पुसभित्र नियमित महाधिवेशन गर्ने गरी कार्यतालिका ल्याउने तयारी गरेका छन्।

तर, संस्थापन पक्ष नै विभाजित भएपछि खड्कामाथि दबाब बढेको छ। पटक पटक महाधिवेशनको मितिमा कुरा नमिलेपछि सर्दै आएको बैठक आज राख्नुपर्ने दबाब खड्कामाथि छ। महामन्त्रीद्वय गगन थापा र विश्वप्रकाश शर्मालाई समेत सहमतिमा ल्याउनको लागि खड्काले मध्यमार्गी प्रस्ताव ल्याउन खोजिरहेका छन्।

खड्काले महाधिवेशनको कार्यतालिका ल्याउने तयारी गरेपछि संस्थापन पक्षका असन्तुष्ट नेताहरूले देउवासँग भेटेका छन्। उनीहरूले फागुन २१ को चुनावमा केन्द्रित हुनुपर्ने भन्दै चुनावअघि महाधिवेशन गर्न नहुने अडान राख्दै आइरहेका छन्। तर देउवाले नेताहरूले खड्काले ल्याएको प्रस्तावमा सहमति जनाएर जान निर्देशन दिएको एक नेताले बताए। सभापतिको आग्रहलाई स्वीकारे अघि बढ्न समेत तयार भएको ती नेताले बताए।