पार्टीभित्रको विवाद सल्टाउन आज पनि छलफलमा जुट्दै देउवा

काठमाडौं । नेपाली कांग्रेसका सभापति शेरबहादुर देउवाले आज पनि पार्टीका शीर्ष नेताहरूसँग छलफल गर्दैछन्। पार्टीभित्रको विवाद समाधान गर्नको लागि दिउँसो २ बजे महाराजगन्जस्थित निवासमा छलफल गर्न लागेको एक नेताले बताए।

आजको छलफलमा कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा सहभागी हुँदै छन्। देउवाले बिहिबारदेखि नै निरन्तर खड्का र महामन्त्रीद्वयसँग छलफल गरिरहेका छन्। यद्यपि कुनै सहमति जुट्न सकेको छैन।

हिजोको छलफलमा चुनावअघि महाधिवेशनको विपक्षमा उभिएका आफूनिकट नेताहरू कृष्णप्रसाद सिटौला र विमलेन्द्र निधिलाई पनि बोलाएर छलफल गरेका थिए।

महाधिवेशनको मितिमा सहमति नजुट्दा कांग्रेसको केन्द्रीय समिति बैठक पटक पटक सार्दै आइरहेको छ। अब अर्को बैठक भोलि दिउँसो २ बजेका लागि बोलाइएको छ।