चिनियाँ नागरिक किन गर्दैछन् मुस्लिम बालिकासँग विवाह ?

काठमाडौँ । नेपाल भारत रोटीबेटीको सम्बन्ध भनिन्छ । तर पछिल्लो समय चिनियाँ नागरिकले समेत मधेशमा विवाह गरिरहेको घटना बाहिर आएको छ ।

बारामा प्रहरीले चिनियाँ र मुस्लिम बालिकाबीचको बालविवाह रोकेको घटनापछि अरु पनि यस्तो विवाह भएको घटना बाहिर आएको हो ।

करैयामाई गाउँपालिका–१, हरैयाबाट बुधबार मध्यराति चिनियाँ नागरिकले मुस्लिम समुदायकी नेपाली नाबालिकासँग बालविवाह गर्ने क्रममा बेहुला–बेहुली र बेहुलीका बाबुलाई प्रहरीले नियन्त्रणमा लिएको हो । उनीहरूलाई जिल्ला प्रहरी कार्यालय कलैयामा राखे थप अनुसन्धान भइरहेको प्रहरी उपरीक्षक नरेन्द्र कुँवरले बताए ।

उनीहरूको नाम भने खुलाइएको छैन । प्रारम्भिक अनुसन्धानमा चिनियाँ नागरिकसँग पासपोर्ट र भिसा रहेको पाइएको छ । स्थानीय बासिन्दाका अनुसार मधेशमा भारतमा विवाह गर्ने चलन पहिलादेखि रहे पनि चिनियाँ नागरिकसँग विवाहका घटना नयाँ हो । यो विवाहले गाउँमा धेरैलाई अचम्मित बनाएको छ ।

एक स्थानीयका अनुसार यस्तो विवाह आर्थिक प्रलोभनमा बिचौलियाले गराइदिने गरेका छन् । एक वर्षयता त्यही गाउँमा तीन विवाह चिनियाँ नागरिकसँग भएको पाइएको पछि यो प्रहरीका लागि पनि अनुसन्धानको विषय बनेको छ । स्केचः साभार