विराटनगर । दुर्गा प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानमा लागेर चन्दा असुली गर्ने चार जना कारबाहीमा परेका छन् ।
महाअभियानमा लागेर चन्दा असुली गरेको भन्दै प्रसाईं नेतृत्वको अभियानले कारबाही गरेको हो । कारबाहीमा पर्नेहरूमा नागरिक बचाउ महाअभियान नेपालका सचिवालय सदस्य, युवा तथा खेलकुद विभाग संयोजक विष्णुजङ्ग बस्नेत, केन्द्रीय सदस्य तथा पीडीएफ सह–संयोजक गोपाल बोहोरा रहेका छन् ।
उनीहरूलाई सबै जिम्मेवारीहरूबाट हटाई निष्काशन गरिएको छ । विज्ञप्ति जारी गर्दै सचिवालय सदस्य ओमप्रकाश लुइँटेल र केन्द्रीय सदस्य तथा मेची अञ्चल सहसंयोजक प्रकाश उप्रेतीलाई पनि सबै जिम्मेवारीहरूबाट हटाई निलम्बन गरिएको प्रसाईं नेतृत्वको महाअभियानले जनाएको छ ।
कारबाहीमा परेकाहरूले पीडितहरूबाट आर्थिक असुल गर्ने धन्दा चलाउने कार्य गरेको, सङ्गठनमा गुट बनाई अराजकता फैलाएको, पीडित नागरिकहरूको कागजपत्र जफत गरी, ब्ल्याकमेलिङ गरेको महाअभियानले जनाएको छ ।
यस्तै सङ्गठनमा लागेर आर्थिक मोलमोलाइ गरेको सङ्गठनको चेनअफ कमान्ड पटक पटक अनुशासनको उल्लङ्घन गरेकाले कारबाही गरेको जनाइएको छ ।
विज्ञप्तिमा भनिएको छ, ‘कारबाही गरिएकाहरूसँग महाअभियानका अभियान्ताहरुले कुनै पनि प्रकारको सङ्गत र गतिविधि नगर्न हुन सचेत गराउँदछौं । यदि पीडितहरू कारबाही गरेकाहरूसँग फसे महाअभियान अथवा हाम्रो सङ्गठन जिम्मेवार नहुने समेत सचेत गराउँदछौ ।’
सङ्गठन विभागका सचिव प्रेमदीप लिम्बू र विभागका प्रमुख प्रेम थापा मगरले संयुक्त हस्ताक्षर गरी विज्ञप्ति जारी गरेका हुन् ।
Leave a Reply