महरालाई छोड्न अदालतले लिएका पाँच आधार

काठमाडौं । पूर्वसभामुख कृष्णबहादुर महरालाई उच्च अदालत पाटनले २० लाख धरौटीमा छाड्न आदेश दिएको छ ।न्यायाधीशद्वय तेजेन्द्रप्रसाद शर्मा र अर्जुनप्रसाद कोइरालाको संयुक्त इजलासले उनीसँग २० लाख धरौटी मागेको हो ।

काठमाडौं जिल्ला अदालतले असोज २९ गते महरालाई पुर्पक्षका लागि थुनामा पठाउन आदेश दिएको थियो। भेपको बट्टाभित्र ९ किलो सुन तस्करी प्रकरणको आरोपमा महरालाई सीआईबीले पक्राउ गरी अनुसन्धान अघि बढाएको थियो।

तर आज अदालतले महरालाई छोड्न पाँच आधार टेकेको छ।

महराउपर जाहेरीमा नाम उल्लेख भएको नदेखिएको, प्रतिवादी बनाइएका सहअभियुक्तहरुले महरालाई पोल नगरेको, चोरी पैठारी भएको भनिएको सुन जफत भएर दसीका रूपमा पेस नभएको, पूरक अभियोगमा नयाँ तथा थप प्रमाण संकलन नभएको र महराको उमेर तथा स्वास्थ्य अवस्थासमेतलाई विचार गर्नुपर्ने आदेशमा उल्लेख छ।