राजेन्द्र श्रेष्ठलाई प्रश्न- नेकपासँग एकता गर्ने तपाईँको सहमतिले पार्टी विभाजनतिर गएको हो ?

काठमाडौं । जनता समाजवादी पार्टीका सङ्घीय परिषद् अध्यक्ष राजेन्द्र श्रेष्ठले नेपाली कम्युनिस्ट पार्टीसँग एकताको लागि वार्ता समितिको तर्फबाट ड्राफ्ट तयार पारिसकेको बताएका छन्।

नेपाल प्रेससँग कुरा गर्दै आफूहरू सहमति गरेको भएपनि केन्द्रीय कार्यकारिणी समिति बैठक नराखेको कारणले अनुमोदन गराउन नपाएको बताए।

उनले भने, ‘पार्टीको निर्णय अनुसार हामीले नेकपासँग कुरा गरेका हौँ। दुवै पक्षले दस्ताबेजहरू अध्ययन गरेर मिल्ने र नमिल्ने बिन्दुहरू छुट्यौँ। नमिलेका कुराहरूमा पनि वार्ता समितिको तर्फबाट छलफल गरेर टुङ्गाएको छौँ। हामीले बाँकी कुरा कार्यकारिणी समिति बैठकमा राखेर टुङ्ग्याउने भन्ने कुरा भएको हो। तर ५ दिनदेखि बैठक स्थगित गरेर राखिएको छैन। बैठक नराखेकै कारणले हामीले गरेको सहमति प्रस्तुत गर्न पाएका छैनौँ। कार्यदल समझदारी गरेर ड्राफ्ट तयार गरेका छौँ।’

उनले आफूहरूले केन्द्रीय कार्यकारिणी समितिमा राखेर अनुमोदन गराउन चाहेको बताए। उनले थपे, ‘बैठक नराखेको कारणले अहिले पारित गर्न सकेका छैनौँ। हामीले बैठक राख्न भनिरहेका छौँ।’

भनेपछि तपाईँहरूको पार्टी पनि विभाजनतिर जान लागेको भन्ने जिज्ञासामा उनले थपे, ‘अहिले नेपाली समाज ध्रुवीकृत भएको छ। राजनीति पनि त्यतै गइरहेको छ। सबै पार्टीभित्र ध्रुवीकृत भइसकेको छ। त्यसैले आफ्नो विचार अनुसार अगाडि बढ्न स्वाभाविक हो।’

अध्यक्ष र महासचिव नगएपनि तपाईँको टिम नेकपासँग एकताबारे उनले थपे, ‘अहिले हामी त्यसमा प्रवेश गरेका छैनौँ। कार्यकारिणी समिति बैठक डाकियोस् भन्ने हाम्रो कुरा हो। वार्ताको रिपोर्ट लिनुपर्‍यो। पहिला बैठक डाक्नुपर्‍यो भन्ने हाम्रो माग हो।’