इलामका बाढीपहिरो प्रभावितको राहत प्याकेजका लागि ऊर्जामन्त्रीसमक्ष रास्वपा नेता लिम्बूको माग

काठमाडौं । रास्वपा नेता मिलन लिम्बुले ऊर्जामन्त्री कुलमान घिसिङलाई भेटेर इलामका बाढी र पहिरो पीडितलाई तत्काल विशेष राहत, पुनस्थापना तथा पुननिर्माण प्याकेज तय गरेर कार्यन्वयन गरिदिन अनुरोध गरेका छन् । साथै सरकारले गरेको घोषणा कागज र बोलीममा मात्रै सीमित हुन नहुने समेत बताएका छन् ।

गत असोज १८ र १९ गतेको अविरल वर्षापछिको बाढी र पहिरोले इलाममा ठूलो मानवीय तथा भौतिक क्षति भएको थियो । ३९ जनाको मृत्यु, दर्जनौँ घाइते र अर्बौंको आर्थिक क्षति भएको थियो । सरकारले असोज २३ गते तीन महिनाका लागि विपद् संकटग्रस्त क्षेत्र घोषणा गरेको थियो।

तर, संकटग्रस्त क्षेत्र घोषणा गरिएको एक महिना बितिसक्दा पनि सरकारले राहत, पुनस्थापना तथा पुननिर्माणको प्याकेज तय नगरेपछि लिम्बुले ऊर्जामन्त्री घिसिङलाई भेटेका हुन् ।

भेटका क्रममा मन्त्री घिसिङले पुननिर्माण र पुनस्थापनासँग सम्बन्धित तालुक मन्त्रालयहरुको नेतृत्व आफूले नै गरिरहेको बताउँदै विशेष प्याकेज छिटो भन्दा छिटो तय गर्न पहल गर्ने प्रतिबद्धद्धता जनाएको लिम्बुले बताए ।