नेकपा एसका नेताहरूलाई योगेशले भने- अमुक नेतालाई जिताउनै पर्ने पूर्वसर्त स्वीकार गर्ने/नगर्ने तपाईँहरूको विवेक हो

काठमाडौं । नेकपा एमालेका सचिव योगेश भट्टराईले नेकपा समाजवादीबाट आउने नेताहरूलाई पार्टीमा स्वागत गर्न तयार रहेको बताएका छन् ।

जनताको बहुदलीय जनवादप्रतिको प्रतिबद्धता नै एकताको मुख्य आधार भएको उल्लेख गर्दै उनले अरू सबै तपशीलका विषय भएको उल्लेख गरेका छन् ।

पार्टीमा आउँदा नीति र नेतृत्व स्वीकार गर्नुपर्ने शर्त पनि सुनिएको उल्लेख गर्दै उनले सामाजिक सञ्जालमा लेखेका छन्, ‘नीति र नेतृत्वलाई अस्वीकार गरेर सहकार्य कसरी हुन्छ र ? यो भनिरहनु पर्ने विषय नै होइन । जबज हाम्रो सिद्धान्त हो, नीति हो । तपाईँ हाम्रो साझा प्रयत्नले यसलाई थप परिष्कृत र समृद्ध बनाउने हो ।’

प्रतिस्पर्धाबाट छानिएको नेतृत्व एकताको आधार उल्लेख गर्दै उनले भनेका छन्, ‘अमुक नेतालाई जिताउनै पर्ने पूर्व शर्त स्वीकार गर्ने या नगर्ने यो यहाँहरूकै विवेकको विषय हो । तर एमालेमा समाहित हुनु कुनै शर्तभन्दा पनि माथिको महत्वको सवाल हो ।’