उत्तर कोरियाको सर्वोच्च जनसभाका पूर्वअध्यक्ष किम योङ नामको निधन

काठमाडौं । उत्तर कोरियाको सुप्रिम पिपुल्स असेम्बली (सर्वोच्च जनसभा) स्थायी समतिका पूर्वअध्यक्ष किम योङ नामको निधन भएको छ । ९७ वर्षको उमेरमा क्यान्सर रोगका कारण नामको निधन भएको उत्तर कोरियाली केन्द्रीय समाचार संस्था केसीएनए वाचले जनाएको छ ।

३ नोभेम्बर दिउँसो १२ बजे मृत्यु भएका नेता नामको जन्म विदेशी साम्राज्यवादको औपनिवेशिक कालमा भएको र उनले कठिन अवस्थाको सामना गर्दै आफ्नो युवा अवस्थामा स्वतन्त्रताको स्वागत गरेको केसीएनएले उल्लेख गरेको छ ।

१७ वर्षको उमेरदेखि नेता नाम सामाजिक गतिविधि र देशको समृद्धिका लागि समर्पित रहेको समाचारमा जनाइएको छ । ८० बर्से क्रान्तिकारी गतिविधिका क्रममा उनले पार्टी, देश र जनताको समृद्ध ज्ञान र उच्च दायित्वबोधका साथ गणतन्त्रको गौरवशाली इतिहासलाई अगाडि बढाएको उल्लेख छ ।

स्थानीय समयअनुसार मंगलबार दिउँसो १ बजे कोरिया वर्कर्स पार्टीका महासचिव तथा डेमोक्रेटिक पिपुल्स रिपब्लिक अफ कोरियाका राज्य मामिलाका अध्यक्ष किम जोङ उनले पार्थिव शरीरमा पूष्पाञ्जली अर्पण गरेको र संवेदना व्यक्त गरेको केसीएनएले जनाएको छ ।