अमेरिकी रक्षामन्त्रीले भने– वासिङटन र बेइजिङ सैन्य सञ्चार स्थापित गर्न सहमत

काठमाडौं । अमेरिकाका रक्षामन्त्री पीट हेगसेथले वासिङटन र बेइजिङ सैन्य सञ्चार स्थापित गर्न सहमत भएको आइतबार बताएका छन् । उनले दुवै देशका बीच द्वीपक्षीय सम्बन्ध यसभन्दा अघि कहिल्यै पनि नरहेको उल्लेख गरेका छन् ।

शनिबार अबेर राति एउटा क्षेत्रीय सुरक्षा बैठकका क्रममा चिनियाँ समकक्षी डोङ जूूनसँग कुराकानी गरेको उनले बताएका छन् । उनका अनुसार शान्ति, स्थिरता र राम्रो सम्बन्ध दुई ठूला र महान देशका लागि सर्वोत्तम मार्ग रहेकामा दुवै सहमत भएका छन् ।

सामाजिक सञ्जाल एक्समा पोस्ट गरिएको हेगसेथको टिप्पणी ‘दक्षिण–पूर्वी एसियाली देश र दक्षिण चीन सागरसम्म चीनको बढ्दो ‘अस्थिरता’ निम्त्याउने कारबाहीका लागि स्पर्धा गर्न दृढ रहेको र आफ्नो समुद्री सेनालाई बलियो बनाउन आग्रह गरेको’ केही घण्टापछि आएको हो ।

हेगसेथ शनिबार दक्षिण–पूर्वी एसियाली राष्ट्र संघ (आसियान) का समकक्षीका साथ बैठकमा थिए । उनले समकक्षीका बीचमा दक्षिण चीन सागरमा चीनले व्यापक क्षेत्रीय र समुद्री विवाद निम्त्याएकाले शान्तिपूर्ण तरिकाले समाधान गर्ने प्रतिबद्धता जनाएका थिए । समाचार एजेन्सी एपीका अनुसार हेगसेथले भने, ‘हामी शान्ति चाहान्छौं । हामी संघर्ष चाहाँदैनौं । तर चीन तपाईँमाथि वा कोहीमाथि हावी हुने प्रयास नगरोस् भन्ने कुरो सुनिश्चित हुनुपर्छ ।’

दक्षिण चीन सागर एसियाको सबैभन्दा अस्थिर विवाद विन्दुमध्ये एक हो । जहाँ बेइजिङले सबै क्षेत्र आफ्नो भएको दावी गर्दै आएको छ । तर आसियानका सदस्य राष्ट्रहरू फिलिपिन्स, भियतनाम, मलेसिया र ब्रुनाईसमेत तटीय क्षेत्रको स्वामित्व दावी गर्छन् ।

इण्डियन एक्सप्रेसको रिपोर्टअनुसार अमेरिकी सहयोगी फिलिपिन्स र चीनबीच यस क्षेत्रमा बारम्बार झडप भइरहेका छन् । फिलिपिन्सले बलियो क्षेत्रीय प्रतिक्रियाको माग गर्दै आएको भए पनि आसियानले चीनसँगको आफ्नो आर्थिक सम्बन्धलाई ध्यानमा राख्दै सन्तुलन कायम गर्न प्रयास गरिरहेको छ ।

शनिबारको बैठकमा हेग्सेथले चीनले सन् २०१२ मा फिलिपिन्सबाट कब्जा गरेको स्कारबोरो सोललाई हालै ‘प्रकृति आरक्ष’ घोषणा गरेको कदमको कडा आलोचना गरे ।

उनका अनुसार यो कदम चीनले आफ्नो क्षेत्रीय र समुद्री दाबी विस्तार गर्न अर्को प्रयास हो । उनले आसियान सदस्य राष्ट्रहरूलाई चीनसँग लामो समयदेखि रोकिएको समुद्री आचारसंहिता छिटो टुङ्ग्याउन आग्रह गरे ।