सुपरमार्केटमा आगलागी हुँदा मेक्सिकोमा २३ जनाको मृत्यु

काठमाडौं । मेक्सिकोको उत्तर–पश्चिमी राज्य सोनाराको केन्द्र हर्मोसिल्लोस्थित एक स्टोरमा भीषण आगलागी र विष्फोट हुँदा २३ जनाको मृत्यु भएको छ । मृत्यु हुनेमा बालबालिका समेत रहेको बताइएको छ ।

आगलागीमा परी १२ जना घाइँते भएका छन् । यो घटना शहरको डाउनटाउन इलाकास्थित वाल्डोज स्टोरमा भएको हो । सोनाराका गभर्नर अल्फोन्सो दुराजोले सामाजिक सञ्जालमा भिडिओ पोस्ट गर्दै घटनाको पुष्टि गरेका छन् । उनले पीडित परिवारप्रति संवेदना व्यक्त गरेका छन् ।

राज्यका अटर्नी जनरल गुस्तावो सालास चावेजले विषाक्त ग्याँसका कारण श्वासप्रश्वासमा समस्या भएपछि मृत्यु भएको बताएका छन् । आगजनी गरिएको विषयमा एकीन जानकारी नआएको उनको भनाइ छ । घटनाका घाइँतेहरूलाई हर्मोसिल्लोका ६ अस्पतालमा भर्ना गरिएको छ ।

राष्ट्रपति क्लाउडिया शिनबामद्वारा शोक प्रकट

मेक्सिकोकी राष्ट्रपति क्लाउडिया शिनबामले सामाजिक सञ्जाल एक्समा पोस्ट गर्दै संवेदना व्यक्त गरेकी छन् । सरकारको राहत टोली घटनास्थलमा पुगेको बताइएको छ ।

स्थानीय प्रशासनले निकै जटिलतापछि आगलागी नियन्त्रणमा लिएको जनाएको छ । घटना सम्बन्धमा अनुसन्धान भइरहेको बताइएको छ ।