नेकपा एसलाई माओवादीमा मिसाउनुअघिको आश्रयस्थल मात्रै बनाइएको पुष्टि भयो : हिक्मत कार्की

विराटनगर । नेकपा एमालेका स्थायी कमिटी सदस्य एवं कोशी प्रदेशका मुख्यमन्त्री हिक्मतकुमार कार्कीले विगतमा २ पटक गरिएको पार्टी विभाजन सिद्धान्तगत मतभेद नभई पद, प्रतिष्ठा र अवसरका लागि मात्र गरिएको पुष्टि भएको बताएका छन् ।

कार्कीले फेसबुकमा स्टाटस लेख्दै नेकपा एसको पछिल्लो निर्णयले ७८ को पार्टी विभाजन एमाले कमजोर पार्ने र आफू मूल नेतृत्वमा नभएको पीडा र आक्रोश व्यक्त गर्न खोजेको मात्रै देखिएको उल्लेख गरेका छन् ।

‘त्यसभन्दा बढी त नेकपा (समाजवादी) लाई माओवादीमा सम्मिलित गराउनु अघिको आश्रय स्थल (स्टपेज) मात्रै हो भन्ने पुष्टि भएको छ’, कार्कीको तर्क छ ।

उनले पार्टी फुटाएर गएका सबै नेता-कार्यकलाई फर्किन आव्हान गर्दै आफूले दुस्ख गरेर बनाएको र एमालेलाई थप सशक्त बनाउन आग्रह गरेका छन् ।

‘अहिले एमाले देशको विषम परिस्थितिको सटिक विश्लेषण गर्दै आफ्ना नीति, विधि र नेतृत्वको सुष्म र वैज्ञानिक ढंगले निरोपण गर्न ऎतिहासिक महाधिवेशनको तयारीमा छ। यही अवसरलाई सदुपयोग गर्दै राष्ट्रिय महाधिवेशनलाई उत्सवमा परिणत गर्दै नेकपा (एमाले) लाई नेपालकै निर्णायक राष्ट्रिय शक्तीमा रुपान्तरण गरौं’, कार्कीको अपील छ।