मलेसियाले मेनपावरबारे तोकेको नयाँ मापदण्डमा प्रधानमन्त्रीको चासो, कूटनीतिक पहल गर्ने

काठमाडौं । प्रधानमन्त्री सुशीला कार्कीले मलेसिया सरकारले वैदेशिक रोजगार व्यवसायीका लागि तोकेको नयाँ मापदण्डबारे चासो लिएकी छन् । यसबाट पर्न सक्ने असर अध्ययन गरी आवश्यक पहल कदमीका लागि गृहकार्य गर्न कार्कीले श्रम मन्त्रालयका सचिव कृष्णहरि पुष्करलाई निर्देशन दिएकी छन् ।

प्रधानमन्त्रीले बिहीबार बिहान सचिव पुष्करलाई कार्यकक्षमा बोलाएर यस विषयमा जानकारी लिइन् । सचिव पुष्करले मलेसियाले जारी गरेको नयाँ मापदण्डबारे जानकारी भएको भन्दै यसको कूटनीतिकरूपमा सम्बोधन गर्नुपर्ने बताए ।

प्रधानमन्त्री कार्कीले परराष्ट्र, अर्थ र श्रम मन्त्रालयसँग पनि समन्वय गरेको सचिवालयले जनाएको छ । मलेसिया नेपाली कामदार वैदेशिक रोजगारीमा जाने प्रमुख गन्तव्यमध्येको एक हो ।

नेपालमा करिब १२०० वैदेशिक रोजगारी व्यवसायीमध्ये ९०० वटा मलेसियाकै व्यवसायमा आश्रित छन् ।

मलेसियाको नयाँ मापदण्डले नेपालका करिब एक दर्जन ठूला कम्पनी मात्र उक्त मुलुकमा कामदार पठाउन योग्य हुने वैदेशिक रोजगारी व्यवसायीहरूले बताएका छ्न् ।