काठमाडौं । नेपाली कांग्रेसका युवा नेता भूपेन्द्रजंग शाहीले मंसिरभित्रै सम्पन्न गर्नुपर्ने जिम्मेवारीबाट भागेर हिँड्ने छुट कसैलाई पनि नभएको बताएका छन्।
अहिलेको समस्याको निकास पुरानै पारा, पुरानै तरिका, पुरानै सोच र पुरानै म्यान्डेटबाट सम्भव हुन नसक्ने भएकाले मंसिरभित्रै महाधिवेशन गर्नुपर्ने उनको भनाइ छ।
‘परिवर्तनको सन्देश र अहिलेको जेनजी पुस्ताको सहभागितालाई सुनिश्चितता गर्दै नियमित महाधिवेशन मंसिरभित्र गर्नुको अर्को कुनै विकल्प छैन’ उनले भनेका छन्, ‘नियमित महाधिवेशनको विकल्प नै नियमित महाधिवेशन हो।’
अलमलमा पारेर नियमित महाधिवेशनलाई ओझेलमा पार्ने गरी विषायन्तर नगर्न आग्रह गर्दै पानीमाथि बसेर कोही ओभानो नहुने उनको भनाइ छ।
बिहीबारदेखि नेपाली कांग्रेसको केन्द्रीय समिति बैठक बस्दैछ। कांग्रेसभित्र मङ्सिरभित्रमै नियमित महाधिवेशन गर्नुपर्ने वा विशेष महाधिवेशन गर्नुपर्ने विषय पेचिलो बन्दै आएको छ । चुनाव सकेर वैशाखमा महाधिवेशन गर्नुपर्नेलगायतका फरक मागसमेत राखिँदै आएको छ । केन्द्रीय समिति बैठकमा महाधिवेशन कार्यतालिकाबारे नेताहरूले धारणा राख्ने कार्यक्रम रहेको छ ।
Leave a Reply