समयमा चुनाव गर्न नसके सरकारको औचित्यमाथि प्रश्न उठ्छ : नेता महर

डडेल्धुरा । नेपाली कांग्रेसका केन्द्रीय सदस्य नैनसिंह महरले तोकिएकै समयमा निर्वाचन गर्न सरकार इमानदार हुनुपर्ने बताएका छन्। डडेल्धुरा पुगेका नेता महरले कार्यकर्ता भेटघाटमा बोल्दै यो सरकार जनादेश प्राप्त नभएकाले निर्वाचन सम्पन्न गर्नुपर्ने बताए।

उनले भने, ‘तत्कालीन समयमा राष्ट्रपतिको समन्वयमा आन्दोलनकारी, राजनीतिक दलका नेता र नेपाललाई माया गर्ने देशी विदेशी कूटनीतिक क्षेत्रका मित्रहरूको चाहना नै फागुन २१ गते निर्वाचन सम्पन्न गरेर देशलाई निकास दिने भन्ने हो।’

समयमा चुनाव गर्न नसके सरकारको औचित्यमाथि नै प्रश्न उठ्ने बताए। उनले सरकार चुनाव सम्पन्न गर्ने भन्दा पनि खलबल्याउने पक्षमा देखिएको आरोप लगाए।

सरकारले राजनीतिक दलहरूसँग संवाद गरेर, देशी विदेशी मित्रहरूलाई विश्वासमा लिएर, सुरक्षाकर्मीको गुमेको विश्वासलाई बढाएर र जनतामा आत्मविश्वास जगाएर निष्पक्ष र धाँधलीरहित निर्वाचन गराउनुपर्ने बताए।