मेडागास्कर राष्ट्रपतिको कार्यालयद्वारा ‘कू प्रयास’को निन्दा, अझै पदमा रहेको घोषणा

काठमाडाै‌ं ।  मेडागास्करको राष्ट्रपतिको कार्यालयले मंगलबार एक विशिष्ट सैनिक इकाइले सत्ता कब्जा गरेको दाबीलाई ‘कू प्रयास’ भन्दै कडा निन्दा गरेको छ ।

केही हप्तादेखि सरकारविरुद्ध चलिरहेको प्रदर्शनबीच आएको यो घटनालाई असंवैधानिक भन्दै राष्ट्रपति एन्ड्री रजोएलिना अझै पदमा रहेको पुष्टि गरिएको छ ।

राष्ट्रपतिको कार्यालयले जारी गरेको विज्ञप्तिमा भनिएको छ, “राष्ट्रपति महल अगाडि सशस्त्र सैनिकहरूको उपस्थिति स्पष्ट रूपमा कू प्रयास हो ।”
त्यसैगरी, विज्ञप्तिमा भनिएको छ,“राष्ट्रपति गणतन्त्रका प्रमुखको रूपमा पूर्ण रूपमा पदमा रहनु भएको छ र संविधान र राष्ट्रिय स्थिरता कायम राख्न प्रतिबद्ध हुनुहुन्छ ।”

गत केही हप्तादेखि सरकारविरुद्ध प्रदर्शनहरू भइरहेका बेला ‘सीएपीएसएटी’ नामक विशेष सैनिक समूहले सत्ता कब्जा गरेको दाबी गरेको थियो ।