सन्दीपको समाचारमा कान्तिपुर टिभी चुकेपछि सम्भव सिरोहियाले गरे आफ्नै न्यूजरुमको सार्वजनिक भण्डाफोर

काठमाडौं । क्रिकेटर सन्दीप लामिछानेको विषयमा प्रकाशित गरिएको एउटा समाचार कान्तिपुरका लागि टाउको दुखाइ बनेको छ। समाचार गलत भएको स्वीकार्दै कान्तिपुर टेलिभिजनले क्षमा मागेको छ भने कान्तिपुर मिडिया ग्रुपका प्रवन्ध निर्देशक सम्भव सिरोहियाले आफ्नै न्यूजरुमको सार्वजनिक भण्डाफोर गरेका छन्।

हिजो कान्तिपुर टेलिभिजनको वेबसाइटमा सन्दीपले वेस्ट इन्डिजविरुद्धको पहिलो म्याच नखेल्नुको कारणबारे समाचार प्रकाशित गरिएको थियो । समाचारमा नासा सेक्युरिटिजको लागो अंकित राष्ट्रिय टिमको जर्सी लगाउन सन्दीपले अस्वीकार गरेको र यही विषयको विवादले म्याच नखेलेको दावी गरिएको छ । सन्दीपले तत्कालै यसको खण्डन गर्दै सामाजिक सञ्जालमा कडा स्टाटस लेखेका थिए । सन्दीपको स्टाटस पछि क्रिकेट समर्थहरु कान्तिपुरमाथि खनिए।

आज कान्तिपुर टेलिभिजनको वेवसाइटमा समाचारप्रति क्षमायाचना गरिएको छ ।

कान्तिपुरले भनेको छ, ‘वैकल्पिक खेलाडीमा समेत सन्दीपको नाम किन राखिएन’ शीर्षकमा आइतबार कान्तिपुर टिभीको वेबसाइटमा प्रकाशित समाचारको स्वतन्त्र पुष्टि हुन नसकेकोमा हामी क्षमाप्रार्थी छौं। आधिकारिक स्रोतहरुबाट प्राप्त जानकारीले समाचारमा उल्लेखित विषय पुष्टि हुन नसकेको हो। हामीले लेखेको समाचारबाट पर्न गएको असुविधाका लागि हामी क्षमाप्रार्थी छौं। साथै आगामी दिनमा थप सजगता अपनाउँदै तथ्यपरक समाचार लेख्ने प्रतिबद्धता जाहेर गर्दछौँ।’

तर, कान्तिपुरका प्रवन्ध निर्देशक सिरोहिया यो क्षमायाचनाबाट मात्रै सन्तुष्ट देखिएनन् । उनले फेसबुकमा स्टाटस लेख्दै आफ्नो न्यूजरुमको नेतृत्वप्रति गम्भीर प्रश्न उठाएका छन् । यो समाचारका विषयमा आफूले व्यक्तिगत स्तरबाट छानबिन गरिरहेको समेत उनको भनाइ छ ।

सम्भवले अंग्रेजीमा लेखेको स्टाटसको नेपाली अनुवादः

हिजोको कान्तिपुर टेलिभिजनको खेलकुद समाचारले सन्दीप लामिछानेको बारेमा गरेको रिपोर्टिङ दुखद र गहिरो रूपमा निराशाजनक थियो । हाम्रो संगठनको एकतर्फ, हाम्रो टिम ऐतिहासिक समयमा हुने ऐतिहासिक खेलको प्रसारण अधिकार प्राप्त गर्न दिनरात मेहनत गरिरहेको छ । यो त्यो क्षण हो जब सारा देश खेलकुदमार्फत एकजुट भएर नेपालको उत्सव मनाउँछ ।

तर टेलिभिजन समाचारतर्फ, हामीले निष्पक्षता र इमानदारीको आधारभूत मापदण्ड पनि कायम गर्न सकेनौं । पत्रकारितामा गल्तीहरू हुन्छन् र भविष्यमा पनि हुन सक्छन् । तर यसलाई गल्तीको रूपमा खारेज गर्न सकिँदैन । मैले व्यक्तिगत रूपमा यो घटनाको द्रुत छानबिन गरेको छु र इमानदारीपूर्वक जनतासँग यी कुरा साझा गर्न चाहन्छु :

१) के सन्दीप लामिछानेको पक्षलाई सुन्ने प्रयास गरियो ? पत्रकारिताको आधारभूत सिद्धान्तअनुसार एकपक्षीय रिपोर्ट प्रसारण गर्नुअघि उनको विचार समावेश गर्ने प्रयास गरियो ? भएन ।

२) समाचार प्रसारण भएपछि, समाचार कक्षको नेतृत्वमा कुनै आलोचनात्मक मूल्यांकन गरियो ? यो ठीक देखिएन भन्ने स्पष्ट संकेत कसैले उठाए ? भएन ।

३) यदि यो गल्तीको रूपमा पहिचान भएको थियो भने, के त्यसमा सुधार गरियो ? के समयमै माफी मागियो ? भएन ।

४) यो विषयमा समाचार कक्षलाई जानकारी दिने कुनै स्रोत वा नेतृत्व हुनुपर्छ र त्यसमाथि आधारभूत स्तरको अनुसन्धान भयो ? भएन ।
यो शुद्ध चिया गफ र हल्ला थियो जुन समाचार कक्षमा प्रवेश गर्यो र जसोतसो ‘समाचार’ बन्यो । मलाई कान्तिपुरका धेरै पत्रकारहरूप्रति गर्व छ, उनीहरूको जोश र सार्वजनिक सेवाप्रतिको समर्पणले मलाई प्रेरणा दिन्छ र म उनीहरूको ऊर्जाबाट प्रेरित हुन्छु । हामीले ती टिम सदस्यहरू र हाम्रा दर्शकहरूप्रति न्याय गर्नुपर्छ । हिजोको जस्ता गल्तीहरूलाई अनुमति दिने संरचनात्मक समस्याहरूप्रति हाम्रो शून्य सहनशीलता छ । यसमा समय लाग्नेछ, तर हामी त्यहाँ पुग्नेछौं ।