जेनजी वार्ता टोली भनी राखिएको आफ्नो नाममा आपत्ति जनाउँदै रक्षा बमले भनिन्- रोटी सेक्न खोज्ने अनुहार र समूहसँग सचेत बनौँ

काठमाडौं । जेनजी जनआन्दोलनको म्यान्डेट संस्थागत गर्न भन्दै राष्ट्रपतिसँग वार्ता गर्न भन्दै घोषणा भएको ११ सदस्यीय टोली भित्रनै फेरी विवाद देखिएको छ ।

सरकारसँग आफ्ना मागहरू तत्काल पूरा गर्न माग गर्दै हिजो मिराज ढुङ्गाना, पुरुषोत्तम यादव, प्रवेश दाहाल, कासिफ मिया खान, लगायतका सदस्यहरूको एउटा टोली उनीहरूले बनाएका थिए । उक्त टोलीकै सदस्य रहेकी रक्षा बमले भने आफ्नो त्यसमा समर्थन नगरेको प्रस्ट पारेकी छन् ।

सामाजिक सञ्जाल फेसबुकमार्फत उनले थाहा नै नदिई ,एकतर्फी ढङ्गले आफ्नो नाम वार्ता टोलीमा राखेको भन्दै असहमति जनाएकी हुन्।

आन्दोलनको रापतापमा आफ्नो रोटी सेक्न खोज्ने फरक फरक अनुहार र समूहहरू पनि जन्मिइरहेको भन्दै त्यो निकै नै गम्भीर र दुखद कुरा रहेको उनको भनाइ छ । यसमा सबै चनाखो र सचेत हुनु जरुरी रहेको उनी बताउँछिन् ।

सङ्क्रमणकालीन अवस्थामा रहेको सरकार, आन्दोलनको म्यान्डेट अनुसार नै चल्ने कुरामा उनले आशा प्रकट गरेकी छन् । आन्दोलनको म्यान्डेटभन्दा बाहिर गएको अवस्थामा फेरी सडक सङ्घर्ष गर्ने उनको सङ्केत छ ।