टेन्ट टाँगेर भैरहवा भन्सारको सेवा

रुपन्देही । देशकै दोस्रो ठूलो भन्सार नाकाको रूपमा रहेको रुपन्देहीको भैरहवा भन्सार कार्यालय जेन जी आन्दोलनमा आगजनी र तोडफोडबाट ध्वस्त भएको छ ।

आन्दोलनबाट क्षतिग्रस्त कार्यालयमा जान नसकिएपछि भैरहवा भन्सार कार्यालयले कार्यालय परिसरमै अस्थायी संरचना टेन्ट टाँगेर सेवा सुचारु गरेको हो ।

बिहीबारबाट बन्द भएको सेवा सुरु गरेको भैरहवा भन्सार कार्यालयले जनाएको छ । भदौ २३ गते काठमाडौंबाट सुरु भएको आन्दोलन २४ गते तोडफोड र आगजनी गर्दा यो कार्यालयको काम ठप्प भएको थियो ।

भन्सार कार्यालयका प्रमुख शिवलाल न्यौपाने तोडफोड र आगजनीमा कार्यालयमा क्षति पुर्‍याएपछि वैकल्पिक व्यवस्थामा टेन्ट टाँगेर अत्यावश्यक सामग्रीहरू आयात निर्यात आयात गरिएको बताएका छन् । डिजिटल सिस्टममा अवरोध भएपछि म्यानुअल भए पनि भन्सार जाँच पासको काम भन्सार कार्यालय अगाडि टेन्ट टाँगेर ल्यापटपबाट भइरहेको छ ।

भन्सार एजेन्ट संघका अध्यक्ष मधु पन्थीले कार्यालयले बाहिरै टेन्ट टाँगेर सेवा थालेको र व्यवसायीले आफ्ना काम थालेको जनाए । ‘कार्यालय भित्र पूरै ध्वस्त भएको छ, तर बाहिरैबाट काम थालिएपछि व्यवसायीलाई सहज भएको हो’ उनले भने ।