रुपन्देहीमा आजदेखि नै कर्फ्यु र निषेधाज्ञा हटाइयो, जनजीवन सहज

रुपन्देही । ५ दिनदेखि असहज बनेको रुपन्देहीमा जनजीवन आजदेखि सामान्य बनेको छ ।

आज भदौ २८ गते साँझ ६ बजेदेखि रुपन्देहीमा कर्फ्यु र निषेधाज्ञा हटेको जिल्ला प्रशासन कार्यालयद्वारा जानकारी गराएसँगै २३ गतेदेखिको त्रासदी हटेको हो ।

रुपन्देहीका प्रमुख जिल्ला अधिकारी डा. टोकराज पाण्डेले अब पारस्परिक सद्भाव कायम गर्दै सार्वजनिक सेवा प्रवाह गर्न, शिक्षण संस्था सञ्चालन गर्न, आवागमन सुचारु गर्न र बजार व्यवस्थालाई चलायमान गराउन अनुरोध गरेका छन् ।

जेनजी आन्दोलनका क्रममा २३ गतेदेखि यहाँ रहेका विभिन्न पार्टी कार्यालय, अधिकांश सरकारी कार्यालय, नाम चलेका ठूला पार्टीका नेताका घर तथा व्यावसायिक प्रतिष्ठान सबै तोडफोड र आगजनी गरिएको छ ।

कर्फ्यु र निषेधाज्ञा हटेसँगै आइतबारदेखि सबै शैक्षिक संस्था सुचारु हुने सूचना जारी भइसकेको छ भने यातायात, बजार क्षेत्र आजैबाट सामान्य भएको हो ।