जेनजी पुस्ता दुरुपयोग हुनसक्ने ओलीको चिन्ता, सामाजिक सञ्जाल बन्दबारे के भने ?

काठमाडौं । प्रधानमन्त्री एवं नेकपा एमाले अध्यक्ष केपी शर्मा ओलीले जेन जी पुस्ता देशको स्वाभिमान, कानून र राष्ट्रियता बुझ्न सक्षम रहेको भन्दै दुरुपयोग गर्नेतर्फ सचेत रहनुपर्ने बताएका छन् ।

भर्चुअल दुनियाँमा अभ्यस्त ‘जेनेरेसन जेड’ भनेर चिनिने नयाँ पुस्ताले सामाजिक सञ्जाल निष्क्रिय बनाउने सरकारको कदमविरुद्ध सडक आन्दोलनमा उत्रिने तयारी गरिरहँदा ओलीको यो भनाइ आएको हो ।

गोदावरीमा जारी विधान महाधिवेशनमा समूहगत छलफलको प्रस्तुतीकरणपश्चात सम्बोधन गर्दै ओलीले सरकारले सामाजिक सञ्जाल बन्द गर्न नभई दर्ता मात्र गराउन खोजेको बताए ।

ओलीले भने, ‘अहिलेको पुस्ता देशको स्वाभिमान,  कानून, राष्ट्रियता बुझ्न सक्षम छ । हामीले सामाजिक सञ्जाल बन्द गर्न खोजेको होइन, दर्तामात्र गराउन भनेका हौं । एक वर्षदेखि तारनतार ताकेता गर्दा पनि नमानेपछि अहिलेको अवस्था आएको हो । जेन जी पुस्तालाई दुरुपयोग गर्न सक्छन् । त्यसप्रति सचेत हुनुपर्छ ।’