सुदूरपश्चिममा ऊन व्यवसायलाई प्रवर्द्धन गर्ने मुख्यमन्त्री शाहको तयारी, लगानी गर्न पस्मिना व्यवसायी उत्साही

काठमाडौं । सुदूरपश्चिम प्रदेशका मुख्यमन्त्री कमल बहादुर शाहले प्रदेशमा ऊन व्यवसायलाई प्रवर्द्धन गरिने बताएका छन् ।

लगानी सम्मेलनको लागि काठमाडौंमा पस्मिना व्यवसायीहरूसँगको छलफलमा मुख्यमन्त्री शाहले सुदूरपश्चिममा यसको पर्याप्त सम्भावना रहेको भन्दै सरकारले त्यसलाई व्यवसायिक रूपमा अघि बढाउने तयारी गरेको बताएका हुन् ।

‘सुदूरपश्चिममा पर्याप्त ऊनको सम्भावना छ । उच्च पहाडी र हिमाली क्षेत्रमा हजारौँ भेडा–च्यांग्रा पालन भइरहेका छन्’, मुख्यमन्त्री शाहले भने, ‘हामी अब त्यसको व्यवसायलाई प्रवर्द्धन गर्न गइरहेका छौँ । यसलाई प्रदेशको समृद्धिमा ठूलो भूमिका खेल्ने अपेक्षा गरेका छौँ ।’

उनले गुणस्तर वृद्धि गरेर अन्तर्राष्ट्रिय बजारमा सुदूरपश्चिमको गलैचा पुर्याउने लक्ष्य रहेको बताउँदै व्यवसायीहरूलाई भने, ‘हामी प्रवर्द्धनमा लागिरहेका छौं, तपाईँहरू लगानी गर्नुहोस् ।’

नागरिकको समेत सहभागितामा उद्योग व्यवसायलाई अगाडि बढाउने नीति सरकारले लिएको भन्दै मुख्यमन्त्री शाहले साझा सुविधा केन्द्र स्थापनामा समेत चासो देखाएका थिए ।

‘पीपीपी मोडलमा हामी अगाडि बढ्छौँ । साझा सुविधा केन्द्र स्थापनाको लागि पनि पहल सुरु गर्छौँ’, मुख्यमन्त्री शाहले स्पष्ट पारेका थिए ।

साझा सुविधा केन्द्रबाट इन्स्योरेन्स, औषधिको व्यवस्था, नस्ल सुधार लगायतको सेवा दिँदै पशुपालक किसानलाई सहज बनाउने प्रदेश सरकारको नीति रहेको उनले बताए ।

पूर्व आर्थिक मामिला तथा योजना मन्त्री नरेश शाहीले सुदूरपश्चिममा भेडा पालनबाट ठूलो आम्दानी सिर्जना गर्न सकिने बताएका थिए । ‘हिमाली गाउँपालिका, स्वामिकार्तिक गाउँपालिकामा त्यसको प्रयास पनि भइरहेको छ,’ उनले भने, ‘प्रदेश सरकार लागिरहेको छ । हामी त्यहीबाट समृद्धिको सम्भावना देखिरहेका छौँ ।’

बजुराको रानिसैन र स्वामिकार्तिकमा भेडा बैंक स्थापना गर्ने लक्ष्य रहेको उनले बताए ।

नेपाल पस्मिना इन्डस्ट्रिज एसोसिएसनका अध्यक्ष धन प्रसाद लामिछानेले एक कार्यपत्र प्रस्तुत गर्दै ‘‘व्यवसायीक पशुपालकका लागि तालिम, साझा सुविधा केन्द्र लगायतको आवश्यकता रहेको’’ टिप्पणी गरेका थिए ।

गलैचा उत्पादक संघका बलराम गुरुङले कच्चा पदार्थ तिब्बत र न्युजिल्यान्डबाट ल्याउनुपर्ने बाध्यतासुनाउँदै अब तत्काल सुदूरपश्चिममा आफूहरू लगानी गर्न तयार रहेको बताए ।

‘५/६ अर्ब हामीले कच्चा पदार्थका लागि खर्च गरिरहेका छौँ । सुदूरपश्चिम र कर्णालीमा हामी लगानी गर्न तयार छौँ,’ उनले भने, ‘सरकारले त्यसको वातावरण तयार गरिदिनुपर्छ ।’

छुर्पी संघका अध्यक्ष रेशम पोखरेलले नागरिकहरू सचेत हुन आवश्यक रहेको बताए । ‘हिमाली भेगमा चौरी पालन गर्न सक्छौँ । सुदूरपश्चिममा सम्भावना छ । गाई मात्र होइन, अब चौरीपालनको पनि थालनी गर्नु पर्छ,’ उनले भनेका थिए ।

गलैचा उद्योगी नरेश श्रेष्ठले गाई र भेडामार्फत न्युजिल्यान्ड सम्पन्न भएको उदाहरण दिँदै ‘सुदूरपश्चिमलाई पनि सम्पन्न बनाउन धेरै समय नलाग्ने’’ बताए । ‘‘जग्गा र लगानीमा सरकारले सहजता पैदा गर्दा थुप्रै लगानीकर्ता सुदूरपश्चिम आउन चाहिरहेका छन्,’’ उनले बताए ।

व्यवसायी रबिनकान्त पन्तले ‘‘मासुको बजार ठूलो छ’’ भन्दै ‘‘त्यसबाट पनि प्रदेशलाई समृद्ध बनाउन सकिन्छ’’ बताएका थिए । सुदूरपश्चिममा छुर्पीले मूल्य नपाइरहेको उनको गुनासो थियो ।

‘भएको सम्भावनालाई सुरु गर्नुपर्छ । त्यसपछि सुधार गर्दै जानुपर्छ । नीतिगत समस्या हल गर्नुपर्छ । यसरी प्रदेशलाई समृद्ध बनाउन सकिन्छ’, पन्तले सुझाव दिए ।

सुदूरपश्चिम प्रदेश सरकारले आगामी मंसिर १ र २ गते धनगढीमा विकास तथा लगानी सम्मेलन गर्दैछ । त्यसका लागि काठमाडौँमा लगानीकर्ताहरूसँग छलफल भइरहेको छ ।

छलफलमा मुख्यमन्त्री शाहसहित आर्थिक मामिला मन्त्री बहादुर थापा, सामाजिक विकास मन्त्री मेघराज खड्का उपस्थित छन् ।

प्रदेश सभामा सहभागी सबै दलको तर्फबाट प्रतिनिधिहरू लगानी सम्मेलनको लागि काठमाडौँमा भइरहेको छलफलमा सहभागी छन् । एमालेबाट चक्र मल्ल, माओवादी केन्द्रबाट शिवसिंह ओली, नेकपा एकीकृत समाजवादीबाट नरेश बहादुर र नागरिक उन्मुक्ति पार्टीबाट टिका थापा छलफलमा छन् ।

प्रदेश नीति तथा योजना आयोगका उपाध्यक्ष डा. जीवन राना, सदस्यद्वय नृप सुनार र शेरबहादुर भण्डारी तथा परियोजना विज्ञ दिलिप भट्ट पनि छलफलमा छन् ।