नेकपा एस राई नेतृत्वको युवा संघको सरकारलाई १३ बुँदे ज्ञापन पत्र

काठमाडौं । नेकपा एससम्बद्ध युवा संगठन सञ्जीव राई नेतृत्वको युवा संघले कार्यवाहक प्रधानमन्त्री एवं सहरी विकास मन्त्री प्रकाशमान सिंहसमक्ष १३ बुँदे ध्यानाकर्षण पत्र बुझाएको छ ।

संघले सरकारले लागू गरेको इम्बोस्ड नम्बर, लिपुलेक विवादलगायतका छन् । संविधानको मर्मविपरीत अङ्ग्रेजी भाषामा लेखिने इम्बोस्ड नम्बर र उक्त नम्बर प्लेटहरुमा हुने आरएआइडि ( रेडियो फ्रिक्वेनसि आइडेनडिटि ) चिप्सलाई रिड गर्ने प्राविधिक पूर्वधारको व्यवस्था नगरी कार्यान्वयन गरिएको सूचना जनहित विपरीत भनिएको छ ।

त्यस्तै लिपुलेक पासबाट व्यापार गर्ने भारत-चीनको सहमतिले नेपाली जनताको स्वाभिमानमा ठेस पुगेको भन्दै सम्झौता अस्वीकार गरी उच्चस्तरीय कूटनितिक तहबाट वार्ता र छलफल गरी निर्णय सच्याउन माग गरिएको छ ।

युवाहरूको विदेश पलायन रोक्न यथाशीघ्र युवा लक्षित कार्यक्रम ल्याई कृषि उत्पादन, युवा उद्यमशिल्ता, महिला तथा युवा सहुलीयत कर्जा र बीमाको क्षेत्रमा काम गर्ने गरी अलग्गै बैंक तथा बीमा कम्पनीको माग गरिएको छ ।

ऋण तथा अनुदानमा युवाको पहुँच विकास, युवालाई व्यवसायका लागि विनाधितो ऋण, साना तथा मझौला उत्पादकलाई आवश्यक ऋण, अनुदान, सीप हस्तान्तरण, उत्पादनको बीमालगायतका सुविधाका लागि ध्यानाकर्षण गरिएको छ ।

विदेशमा उच्चशिक्षा तथा सीप हासिल गरेका दक्ष जनशक्तिलाई स्वदेशमा नै योगदान गर्न सक्ने अवसरको सृजना गर्न पनि माग गरिएको छ ।