इभीमै हुन थाल्यो गाँजा ओसारपसार, ६ जना पक्राउ

हेटौँडा । पछिल्लो समय यात्रुबाहक विद्युतीय सवारी साधन इभीमै लागुऔषध गाँजा ओसारपसार भइरहेको पाइएको छ । मकवानपुर प्रहरीले आइतबार दुई वटा इभीमा ठूलो मात्रामा लागुऔषध गाँजासहित ६ जनालाई पक्राउ गरपछि यस्तो खुलासा भएको हो ।

प्रहरीले बा प्र०१–००२ज ६५४९ नम्बरको इभी गाडीमा राखेर हेटौँडा ल्याइएको लागुऔषध गाँजा मकवानपुरको बसामाडी लेवटमा बरामद गरेको हो ।

प्रहरीले इभी चालक काभ्रे, पाँचखाल –८ का २१ वर्षीय सुदिप तामाङ, २० वर्षीय सविन तामाङ र दोलखा शैलुङ–८ का २२ वर्षीय सागर तामाङलाई नियन्त्रणमा लिएको छ । गाडीमा १ सय १२ किलो ७९० ग्राम गाँजा फेला परेको हो । उनीहरुलाई आइतबार नै अदालतबाट म्याद थपेर अनुसन्धान भइरहेको छ ।

यस्तै, आइतबार नै प्रहरीले बसामाडीमै हेटौँडातर्फ आइरहेको बाप्र०६–००१ ज ०५०३ नम्बरको इभी गाडीमा २६ किलो १० ग्राह गाँजा बरामद भएको छ । गाँजासहित मकवानपुर, राक्सिराङ–१ का ३० वर्षीय प्रेमराज मोक्तान, १९ वर्षीय सन्दीप थिङ र १९ वर्षीय बुद्धिलाल मोक्तानलाई पनि प्रहरीले नियन्त्रणमा लिएको छ । उनीहरुलाई पनि अदालतबाट म्याद थपेर अनुसन्धान जारी छ ।