म्युजिक भिडिओ ‘सप्तरंगी’ को प्रिमियर

काठमाडौं। कलाकार अचल शाही ठकुरीको पहिलो मौलिक म्युजिक भिडिओ ‘सप्तरंगी’ को प्रिमियर काठमाडौंमा सम्पन्न भएको छ। मोबाइलको सानो स्क्रिनबाट सुरु भएको उनको यात्रा हिजो विशाल पर्दामा उज्यालो भएर चम्किएको थियो।

कार्यक्रममा विद्यार्थी, कलाकार, शुभेच्छुक र साथीभाइहरूको उल्लेखनीय उपस्थिति रहेको थियो। हल खचाखच भरिएको थियो र भिडिओलाई सुरुदेखि अन्त्यसम्म दर्शकहरू तल्लीन भइ हेरेका थिए ।

भिडियो सकिएपछि हलमा गुन्जिएको ताली र हर्षध्वनीले माहोललाई भावुक बनायो। कतिपय दर्शकको आँखामा आँसु देखिएको थियो, जसले साँझलाई थप ऐतिहासिक बनायो।

‘सप्तरंगी’ केवल एक गीत मात्र नभई अचलको संघर्ष, समर्पण र आत्मविश्वासको कथा हो। मोबाइलको सामान्य क्यामेराबाट सुरु भएको उनको सृजनात्मक यात्रा युट्युबको विशाल पर्दासम्म आइपुगेको छ। गीतमा अचलले आफैं अभिनय गरेका छन् र यसले धेरै दर्शकलाई आफ्नै जीवनसँग जोडिन प्रेरित गरिरहेको छ।

हालै मात्र सार्वजनिक गरिएको यो म्युजिक भिडियो युट्युबमा उपलब्ध छ र छोटो समयमा नै हजारौं दर्शकको मन जितेका छन् ।