पदम गिरीको टिप्पणीः पूर्वराष्ट्रपति राजनीतिमा फर्किँदा गणतन्त्रको गरिमा रहन्न (भिडिओ)

काठमाडौ । नेकपा एमालेका नेता तथा सांसद पदम गिरीले पूर्वराष्ट्रपति विद्यादेवी भण्डारी राजनीतिमा फर्किँदा वर्तमान प्रणालीको गरिमामा आँच आउनसक्ने टिप्पणी गरेका छन् । यसबाट लोकतान्त्रिक गणतन्त्रमाथि प्रहार गरिहेका प्रतिगमनकारी शक्तिहरुलाई बल पुग्ने उनले तर्क गरे ।

पर्वत कुश्माको पार्टी प्रशिक्षण कार्यक्रममा बोल्दै गिरीले एमाले अध्यक्ष केपी ओलीलाई कमजोर पारे खेल भइरहेको पनि बताए । जुनसुकै कारणबाट एमालेविरुद्ध हुने हमलालाई एकताबद्ध भएर निस्तेज पार्न उनले कार्यकर्ता पंतिलाई आह्वान गरे । पार्टीभित्रको नेतृत्व्को विषयमा कुनै विवाद नरहेको उनको भनाइ छ ।

गिरीले भने, ‘अस्ति मात्रै पार्टीको केन्द्रिय समिति वैठक सम्पन्न भयो । नेतृत्वका विषयमा विवाद छैन । नीतिका विषयमा विधान महाधिवेशनमा व्यापक छलफल गरेर जान सक्छौ । यसबेला नेतृत्वलाई कमजोर पार्ने गरी विभिन्न अभिव्यक्तिहरु सामाजिक सञ्जाल र अनेक फोरममा देखिएका छन् । यसबाट कोही पनि भ्रमित बन्नु हुँदैन ।’
गिरीले पूर्वराष्ट्रपतिज्युलाई सदस्यतासम्वन्धी विषय पार्टीले टुंग्याइसकेको उल्लेख गरे ।

उनले थपे, ‘पार्टी सदस्यताको नविकरण गराउने चर्चामा एमाले भन्दा बाहिर रहेका विभिन्न खाला मान्छे संलग्न छन् । उनीहरुले यसलाई व्यापक ढंगले उठाउने र आमजनतामा पूर्वराष्ट्रपतिको सदस्यता नविकरण गरिएन, पार्टी नेतृत्व स्वेच्छाचारी र निषेधकारी भयो भनेर भ्रम सिर्जना गर्ने कोशिष भएको छ । यस्तो भ्रममा कोही पनि पर्नु हुँदैन । विद्यादेवी भण्डारीलाई हामी पूर्वराष्ट्रपतिका रुपमा आदर र सम्मान गर्छौं । त्यसमा कुनै कमि हुँदैन । अहिले भण्डारीप्रति लक्ष्यित भएर यी कुराहरु आएका हेइनन् ।

सम्मानित पदमा पुगेको व्यक्ति फेरि राजनीतिमा फर्किने र पार्टीको सदस्यता लिएर प्रतिस्पर्धा गर्ने कुराले गणतन्त्रको गरिमा रहन्छ कि रहन्न र प्रणालीको रक्षा हुन्छ कि हुँदैन भन्ने प्रश्न हो । यो लोकतान्त्रिक गणतन्त्रमाथि प्रतिगमनकारी शक्तिहरु खेल्न खोजेका छन् । आक्रमण गर्न खोजेका छन् । यस्ता कुराले भोलि त्यसमा मलजल त पुग्दैन रु त्यसतर्फ गम्भीर बन्नुपर्छ भन्ने अर्थमा पूर्वराष्ट्रपति भएको जोकोही व्यक्ति फेरि राजनीतिमा फर्किने प्रवन्ध गर्नु हुँदैन भन्ने निस्कर्ष निकालिएको हो ।’