रास्वपा सांसदबारे प्रधानमन्त्रीको टिप्पणी- संसदमा आएझैँ गर्छन्, भत्ता पड्काएर हिँड्छन्

काठमाडौं । प्रधानमन्त्री केपी ओलीले राष्ट्रिय स्वतन्त्र पार्टी (रास्वपा)ले देशमा अराजकता मच्याउन खोजेको आरोप लगाएका छन्। मधेस प्रदेश प्रहरी कार्यालयको नवनिर्मित भवनको उद्घाटन कार्यक्रमलाई सम्बोधन गर्दै नयाँ भनेर जनतामा भ्रम छरिरहेको टिप्पणी गरे।

उनले भने, ‘राजतन्त्र जस्तो अँध्यारो दिनहरू फर्काउन केही तत्त्वहरू लागिरहेका छन्। केही तत्त्वहरू देशमा अराजकता मच्याउन कुदिरहेका छन्। आम जनतालाई नयाँ शक्ति हौँ भनेर भ्रममा पारिराखेका छन्। नयाँ त भर्खर खोलेका पार्टी नयाँ त हुने नै भए। जसको कुनै योगदान छैन।’

उनले देशलाई आजको स्थितिमा पुर्‍याउनको लागि आफूहरूले बलिदान, संघर्ष र त्याग गरेको पनि सुनाए।

उनले थपे, ‘मान्छेहरू सहिद भए, अङ्गभङ्ग भएका छन्। जेलनेल भोगेर लामो सङ्घर्ष र क्षतिबाट अन्धकार युगबाट आजको जमानामा ल्याइएको हो। सङ्घर्ष नगरेकाहरू, देशलाई भत्काउन चाहनेहरू संसद्मा आएझैँ गर्छन् हाजिर गर्छन्, भत्ता पड्काउँछन् अनि बाहिर जान्छन्। जनताका समस्याका कुरा बोल्दैनन् बाहिर जान्छन्। तिनीहरूलाई यो व्यवस्था अप्रिय लागेको छ। हामी भन्छौँ यो व्यवस्थालाई अझै सुदृढ गरेर लान्छौँ।’