पाठ्यक्रम विकास केन्द्रको अर्को गल्ती, १० कक्षाको नेपालीमा भूपिको गीतमा माधवप्रसाद घिमिरेको नाम

काठमाडौं । पाठ्यक्रम विकास केन्द्रको अर्को गम्भिर गल्ती भेटिएको छ । कक्षा १० को नेपाली किताबमा भूपि शेरचनद्वारा रचित ‘यो नेपाली शिर उचाली’ बोलको बहुचर्चित गीतको गीतकारको रूपमा राष्ट्रकवि माधवप्रसाद घिमिरेको नाम राखिएको त्रुटि फेला परेको हो ।

किताबको ‘वीरता’ पाठमा सबैभन्दा पहिला गीतको दुई पंक्ति राखिएको छ,-

यो नेपाली शीर उचाली संसारमा लम्किन्छ
जूनकिरी झैं ज्योति बाली अन्धकारमा चम्किन्छ

अनि लेखिएको छ, ‘राष्ट्रकवि माधवप्रसाद घिमिरेद्वारा रचित यो हरफले नेपाली गौरवमय वीरगाथालाई प्रतिबिम्बित गरेको छ ।’

केही दिनअघि मात्रै पाठ्यक्रम विकास केन्द्रले गीतकार राजेन्द्र थापाको ‘पोहोर साल खुसी फा्टदा’ बोलको बहुचर्चित गीतको रचनाकारको नाममा अम्बर गुरुङ राखेर गम्भीर त्रुटि गरेको गरेको थियो । अरुणा लामाले गाएको, गुरुङले संगीत भरेको यस गीतको रचनाकार भनेर गुरुङकै नाम राखेपछि सामाजिक सञ्जाल र केही सर्जकले आलोचना गरेका थिए ।

पाठ्यक्रम विकास केन्द्रले विज्ञप्ति निकालेर सच्याउने बताएको छ।

पुनःयस्तो गल्लीते आफूहरु चकित बनेको गीतकार संघका अध्यक्ष वसन्त वित्यासी थापाले बताए । यस्तो त्रुटि ७९ सालदेखि नै भएको भन्दै उनले विद्यार्थीमा ३ वर्षदेखि भ्रम रहेको सुनाए ।

थापाले भने, ‘यो त बर्बाद नै रहेछ । हामीले शिक्षामन्त्रीलाई समय निकाल्न लगाएका छौं, उहाँसँग छलफल गर्छौं । अनि सबै किताबहरु पुनः सच्याउन, क्रसभेरिफाइ गर्न निर्देशन दिन अनुरोध गर्छौँ । राज्यले गर्ने काममा यस्तो धेरै केयरलेस आजका दिनसम्म थाहा थिएन ।’