धनकुटा । नेकपा एमालेका स्थायी कमिटी सदस्य एवं कोशी इन्चार्ज शेरधन राईले पूर्वराष्ट्रपतिको सदस्यता नवीकरण नगर्ने पार्टीमा सर्वसम्मत निर्णय भइसकेकाले यसलाई बहसको विषय नबनाउन निर्देशन दिएका छन् ।
धनकुटाको हिलेस्थित होटल कान्जिरोवामा हिजोदेखि जारी प्रदेश कमिटी बैठकलाई बुधबार सम्बोधनको क्रममा उनले भण्डारीबारे पार्टीले लिएका निर्णय राजनीतिक भएकाले व्यक्ति विशेषका रूपमा लिन नहुने तर्क गरे ।
पूर्वमुख्यमन्त्रीसमेत रहेका राईले भने, ‘एउटा कुरा प्रष्ट पार्छु विद्या भण्डारीबारे पार्टीले लिएको निर्णयलाई व्यक्ति विशेषका रूपमा गरेको निर्णय भनी बुझ्न हुँदैन । एउटा थिति प्रणाली पार्टीको लोकतान्त्रिक निर्णय गरेको सन्दर्भमा अब थप विषय र पात्रमा जोडेर बहस गर्नु हुँदैन ।’
एमाले विधि र नीतिका हिसाबले अगुवा र गुरु पार्टी भएको भन्दै राईले यसले गरेका निर्णय अरु पार्टीले सिक्दै आइरहेको जिकिर गरे ।
भण्डारीबारे कुनै कमिटी र बाहिर पनि छलफल र बहसको विषय बनाउन राम्रो नहुने उनको भनाइ छ ।
राईले थपे, ‘विधान महाधिवेशनमा मत र तर्कहरू आउन सक्छन् । तर, ठाउँ त्यो हैन । यो पार्टीमा सबैतिर सर्वसम्मत हुँदै निर्णय भएको अवस्था हो । एकजना कमरेडले नोट अफ डिसेन्ट राख्नुभयो भन्ने कुरा पनि आएको छ । थाहा थिएन हामीलाई । त्यो अन्तर पार्टीभित्र आउने गरिको हो कि के हो थाहा छैन ।’
Leave a Reply